भारतीय प्रख्यात गायिका आशा भोसलेको आज राजकीय सम्मानका साथ अन्त्येष्टि गरिँदै छ। मुम्बईको शिवाजी पार्कमा उनको अन्त्येष्टि पूर्ण राजकीय सम्मानसहित गरिनेछ।
आइतबार ९२ वर्षको उमेरमा उनको निधन भएको थियो। आशा भोसलेका छोरा आनन्द भोसलेले जानकारी दिँदै भनेका छन्, “अप्रिल १२ मा बिहान साढे १० बजेदेखि दिउँसो २ बजेसम्म ‘कासा ग्रान्डे’ भवनमा आएर आमालाई अन्तिम श्रद्धाञ्जली दिन सकिन्छ।”
उनका अनुसार अन्तिम संस्कार दिउँसो ४ बजे गरिनेछ। अत्यधिक भीड हुन सक्ने भएकाले भीडभाड नगर्न उनले आग्रह गरेका छन्।
आशा भोसलेलाई शनिबार साँझ हृदयघात भएपछि मुम्बईको ब्रीच क्यान्डी अस्पतालमा भर्ना गरिएको थियो। आइतबार उपचारका क्रममा उनको निधन भएको हो।
