प्रधानमन्त्री बालेन्द्र शाह (बालेन)ले प्रतिनिधिसभामा समानुपातिकतर्फ प्रतिनिधित्व गर्ने सांसदहरूसँग आज (वैशाख २) अन्तरक्रिया गर्ने भएका छन्।
प्रधानमन्त्री तथा मन्त्रिपरिषद्को कार्यालयमा मध्याह्न १२ बजे उक्त छलफल आयोजना हुने प्रधानमन्त्रीको सचिवालयले जनाएको छ।
सचिवालयका अनुसार, प्रतिनिधिसभामा रहेका सबै दलका समानुपातिक सांसदहरूलाई सहभागी गराई प्रधानमन्त्री बालेनले प्रत्यक्ष संवाद गर्ने कार्यक्रम तय गरिएको हो। यसअघि उनले प्रत्यक्षतर्फ निर्वाचित सांसदहरूसँग प्रदेशगत रूपमा अन्तरक्रिया गरिसकेका छन्।
प्रधानमन्त्रीको सचिवालयले जनाएअनुसार, जनप्रतिनिधि र कार्यपालिकाबीच प्रत्यक्ष समन्वय र संवादलाई सुदृढ बनाउँदै नीति निर्माण तथा कार्यान्वयन प्रक्रियालाई थप प्रभावकारी बनाउने उद्देश्यले कार्यक्रम आयोजना गरिएको हो।
अन्तरक्रियामा सहभागी सांसदहरूले आफ्नो–आफ्नो क्लस्टरअन्तर्गतका समस्या, चुनौती तथा समाधानका उपायहरू प्रस्तुत गर्ने अपेक्षा गरिएको छ।
उक्त कार्यक्रमलाई सुशासन प्रवर्द्धन, उत्तरदायित्व अभिवृद्धि तथा जनमुखी शासन प्रणाली सुदृढ गर्ने महत्वपूर्ण अवसरका रूपमा हेरिएको छ।
