काठमाडौं — सम्पत्ति शुद्धीकरण अनुसन्धान विभागले पूर्वमन्त्री दीपक खड्कासम्बन्धी अनुसन्धान फाइल प्रारम्भिक प्रमाणसहित अख्तियार दुरुपयोग अनुसन्धान आयोगमा पठाएको छ।
विभागले सोमबार खड्काविरुद्ध संकलित प्रमाणहरू अख्तियारलाई बुझाएको हो। खड्का हाल सम्पत्ति शुद्धीकरणको कसुरमा पक्राउ परेका छन्। उनलाई चैत १५ गते केन्द्रीय अनुसन्धान ब्युरो (सीआईबी) ले पक्राउ गरेको थियो।
यसअघि विभागले म्याद लिएर उनीमाथि अनुसन्धान गरिरहेको थियो। तर, हाल प्रचलित कानुनी व्यवस्थाअनुसार सम्बन्धित मूल कसुरको अनुसन्धान भइरहेको निकायमार्फत नै मुद्दा अघि बढाउनुपर्ने भएकाले फाइल अख्तियारमा पठाइएको बताइएको छ।
यसैबीच, गृहमन्त्री सुधन गुरुङ टंगालस्थित अख्तियारको कार्यालय पुगेर प्रमुख आयुक्त प्रेम राईसँग भेट गरेका छन्। भेटमा खड्काको अनुसन्धान प्रक्रिया अघि बढाउने विषयमा छलफल भएको एक उच्च अधिकृतले जानकारी दिएका छन्।
विभागका अधिकारीहरूका अनुसार अख्तियारले भ्रष्टाचार र गैरकानुनी सम्पत्ति आर्जनसम्बन्धी अनुसन्धान अघि बढाएपछि प्रमाणको आधारमा सम्पत्ति शुद्धीकरणको पक्ष पनि थप विस्तृत रूपमा अनुसन्धान गर्न सकिने व्यवस्था छ।
सम्पत्ति शुद्धीकरण (मनी लाउन्डरिङ) निवारण ऐन संशोधनपछि विभागको प्रत्यक्ष अनुसन्धान अधिकार केही सीमित भएको जनाइएको छ। अब अधिकांश मुद्दा सम्बन्धित मूल कसुरको अनुसन्धान निकायबाटै अघि बढ्ने प्रावधान छ।
खड्का यसअघि ऊर्जा, जलस्रोत तथा सिँचाइमन्त्री तथा खानेपानी राज्यमन्त्री भइसकेका थिए। उनी दुई पटक सांसदसमेत निर्वाचित भएका थिए।
