काठमाडौं । गण्डकी प्रदेश सरकारमा आज (वैशाख २) मन्त्रिमण्डल पुनर्गठन गरिने भएको छ। यसअन्तर्गत नयाँ मन्त्रीहरूको शपथग्रहण कार्यक्रम पनि आजै तय गरिएको छ।
मुख्यमन्त्रीका प्रेस संयोजक नरहरी सापकोटाका अनुसार, नयाँ मन्त्रीहरूलाई मध्याह्न १२ बजे पोखरास्थित पर्यटन बोर्ड प्रादेशिक कार्यालयमा शपथ गराइनेछ।
मुख्यमन्त्री सुरेन्द्रराज पाण्डेबाहेक वर्तमान मन्त्रिपरिषद्का सबै सदस्यहरू परिवर्तन गरिने जनाइएको छ।
हाल गण्डकी प्रदेशमा नेपाली कांग्रेसबाट अर्थमन्त्री टकराज गुरुङ, वन तथा वातावरण मन्त्री भेषबहादुर पौडेल र सामाजिक विकास मन्त्री विन्दुकुमार थापा रहेका छन्। त्यस्तै नेकपा एमालेबाट भौतिक पूर्वाधार मन्त्री प्रकाशबहादुर केसी, कृषि तथा भूमि व्यवस्था मन्त्री पद्या जिसी श्रेष्ठ, स्वास्थ्य मन्त्री कृष्ण पाठक र पर्यटन मन्त्री मित्रलाल बस्याल कार्यरत छन्।
नयाँ मन्त्रिपरिषद्मा कस–कसलाई समावेश गरिने भन्ने विषय भने अझै औपचारिक रूपमा सार्वजनिक गरिएको छैन।
