काठमाडौं । शिक्षा, विज्ञान तथा प्रविधिमन्त्री सस्मित पोखरेलसँग नेपालका लागि बेलायतका राजदूत रब फेनबीच शिष्टाचार भेटवार्ता भएको छ।
मन्त्री पोखरेलको कार्यकक्षमा आज सम्पन्न भेटमा नेपाल–बेलायतबीचको सम्बन्ध सुदृढ बनाउने तथा शिक्षा क्षेत्रमा आपसी सहयोग र सहकार्य विस्तार गर्ने विषयमा छलफल भएको थियो।
भेटका क्रममा मन्त्री पोखरेलले नेपालको शैक्षिक विकासमा बेलायत सरकारले पुर्याउँदै आएको सहयोगप्रति आभार व्यक्त गर्दै सातै प्रदेशमा सञ्चालन गर्न लागिएको ‘अटिजम’ विद्यालयका लागि थप सहयोगको अपेक्षा गरेका थिए।
उनले विशेषगरी उक्त विद्यालयका लागि आवश्यक स्रोत र जनशक्ति विकासमा सहयोग गर्न राजदूत फेनसमक्ष अनुरोध गरेको मन्त्रीको निजी सचिवालयले जनाएको छ।
