काठमाडौं महानगरपालिका–११ मा सञ्चालित बागमती स्विट्स प्रा.लि.को उत्पादन र बिक्री वितरणमा रोक लगाइएको छ। बदाममा कीरा भेटिएपछि खाद्य प्रविधि तथा गुण नियन्त्रण विभाग र जिल्ला प्रशासन कार्यालय, काठमाडौंको संयुक्त अनुगमन टोलीले यस्तो निर्णय गरेको हो।
अनुगमनका क्रममा उद्योगको सरसफाइ र गुणस्तरमा गम्भीर लापरबाही भेटिएको छ। ड्राइफ्रुट्स प्याकिङका लागि राखिएको बदाममा कीरा भेटिएपछि करिब ५ किलो बदाम जफत गरी नष्ट गरिएको विभागले जनाएको छ।
उद्योगको सरसफाइ अत्यन्तै न्यून रहेको तथा कीट नियन्त्रणको व्यवस्था प्रभावकारी नभएको पनि पाइएको छ। खाद्य स्वच्छता तथा गुणस्तर ऐन, २०८१ अनुसार अर्को आदेश नआएसम्म उत्पादन र बिक्री वितरण पूर्ण रूपमा रोक्का गरिएको छ।
थप अनुसन्धानका लागि नमुना संकलन गरी प्रयोगशालामा पठाइएको छ। उद्योगलाई सुधार गरी तीन दिनभित्र विभागमा उपस्थित हुन निर्देशन दिइएको छ।
