काठमाडौं । भारतले लिपुलेकसम्म सडक विस्तारलाई तीव्रता दिँदै मानसरोवर यात्राका लागि नेपालको मार्ग प्रयोग नगर्ने तयारी अघि बढाएको छ।
सोमबार भारतको उत्तराखण्ड राज्यस्थित देहरादूनमा आयोजित कार्यक्रममा भारतीय प्रधानमन्त्री Narendra Modi ले दिल्ली–देहरादून एक्सप्रेसवे उद्घाटन गरेका थिए। करिब १२ हजार करोड भारतीय रुपैयाँ लागतको उक्त परियोजनाको उद्घाटन समारोहमा भारतीय सडक परिवहन तथा राजमार्गमन्त्री Nitin Gadkari ले महत्वपूर्ण धारणा व्यक्त गरे।
उनले भारत सरकारले मानसरोवरसम्म सिधा सडक पहुँच विस्तार गर्ने लक्ष्यसहित काम गरिरहेको बताउँदै अब भारतीय पर्यटकले नेपाल हुँदै यात्रा गर्नुपर्ने बाध्यता हट्ने उल्लेख गरे।
‘मानसरोवरप्रति हाम्रो गहिरो आस्था छ,’ मन्त्री गडकरीले भने, ‘हाल नेपाल हुँदै यात्रा गर्नुपर्ने अवस्था छ, तर अब त्यो आवश्यक नपर्ने गरी पूर्वाधार निर्माण भइरहेको छ।’
उनका अनुसार करिब ५ हजार २०० करोड रुपैयाँ लागतमा टनकपुर–पिथौरागढ हुँदै लिपुलेकसम्म सडक निर्माण भइरहेको छ। कुल ३७० किलोमिटरमध्ये करिब २०० किलोमिटर सडक निर्माण सम्पन्न भइसकेको छ भने बाँकी १२९ किलोमिटर खण्डमा केही प्राविधिक समस्या देखिएको छ। ती समस्या समाधान गरी आगामी वर्षभित्र परियोजना सम्पन्न गर्ने लक्ष्य राखिएको छ।
भारतले नेपाली भूभाग मानिने लिपुलेक क्षेत्रमा सडक निर्माणलाई प्राथमिकतामा राख्दै आएको छ। यस मार्गलाई मानसरोवर जोड्ने रणनीतिक मार्गका रूपमा विकास गरिँदैछ।
हालसम्म भारतीय पर्यटकहरू प्रायः नेपालको कर्णाली प्रदेश हुँदै मानसरोवर जाने गरेका छन्। तर भारतको यो पहलले भविष्यमा नेपालको मार्ग प्रयोग घट्ने संकेत देखिएको छ।
