काठमाडौं । नेपालका विभिन्न जिल्लामा सुन चोरीमा संलग्न रहेको आरोपमा दुई महिला र दुई पुरुषसहित चार पाकिस्तानी नागरिक पक्राउ परेका छन्।
जिल्ला प्रहरी कार्यालय कपिलवस्तुका प्रहरी नायब उपरीक्षक रिपेन्द्रकुमार सिंहका अनुसार वैशाख १ गते चन्द्रौटाबाट दुई महिला र वैशाख ५ गते त्रिभुवन अन्तर्राष्ट्रिय विमानस्थल बाट दुई पुरुष पक्राउ परेका हुन्।
विमानस्थलबाट पक्राउ पर्नेहरू २३ वर्षीय इरफान अली र ४४ वर्षीय सैफर रहमान हुन्। उनीहरूबाट १७,१३६ अमेरिकी डलर, साउदी रियाल ३२५, बंगलादेशी टाका १,६१५, युएई दिराम ५ र मलेसियाली रिंगेट १८५ बरामद गरिएको छ। साथै एक/एक थान इन्फिनिक्स र आइफोन १६ मोबाइलसमेत फेला परेको प्रहरीले जनाएको छ।
यसअघि चैत १ गते कपिलवस्तुको चन्द्रौटास्थित सुन पसलमा चोरी गरेको आरोपमा २० वर्षीया बिबी कसलुम र ४१ वर्षीया सबाना पक्राउ परेका थिए। उनीहरूले गहना किन्ने बहानामा पसल प्रवेश गरी सुन चोरी गर्ने गरेको सिसिटिभी फुटेजमा देखिएको थियो। चोरीपछि पहिचान लुकाउन मास्कमाथि बुर्का प्रयोग गर्ने गरेकोसमेत खुलेको छ।
प्रहरीले उनीहरूबाट ३८ लालको सुनका झुम्का, नगद ८६ हजार ४० रुपैयाँ, पाकिस्तानी मुद्रा र पासपोर्ट बरामद गरेको छ। साथै उनीहरूले बागेश्वरी र सच्चिदानन्द ज्वेलर्सबाट समेत सुन चोरी गरेको स्वीकार गरेका छन्।
प्रारम्भिक अनुसन्धानअनुसार उक्त गिरोहले इटहरी, मोरङ र बुटवलमा समेत सुन चोरी गरेको देखिएको छ। पक्राउ परेका चारै जनामाथि अदालतबाट म्याद थप गरी थप अनुसन्धान भइरहेको प्रहरीले जनाएको छ।
