काठमाडौँ– अमेरिकी राष्ट्रपति डोनाल्ड ट्रम्पले इजरायल र लेबनानबीच जारी युद्धविरामलाई थप तीन हप्तासम्म विस्तार गरिएको घोषणा गरेका छन्।
ट्रम्पले आफ्नो सामाजिक सञ्जाल ‘ट्रुथ सोसल’ मार्फत हालै भएको वार्तापछि युद्धविराम अवधि थप ३ हप्ताका लागि लम्ब्याउने सहमति भएको जानकारी दिएका हुन्। उनले उक्त बैठकलाई “धेरै सकारात्मक” भएको बताउँदै लेबनानलाई हिज्बुल्लाहबाट हुने खतरा नियन्त्रणमा सहयोग गर्ने प्रतिबद्धता पनि व्यक्त गरेका छन्।
यसअघि वाशिङ्टनमा भएको छलफलपछि घोषणा गरिएको युद्धविराम आइतबार समाप्त हुने तय थियो। यो सहमति इजरायल र इरान समर्थित हिज्बुल्लाहबीच सात हप्ताभन्दा बढी समयदेखि जारी तनाव अन्त्य गर्ने उद्देश्यले गरिएको हो।
ओभल अफिसमा ट्रम्पले लेबनानका राष्ट्रपति जोसेफ औन र इजरायली प्रधानमन्त्री बेन्जामिन नेतन्याहू आगामी केही साताभित्र ह्वाइट हाउस भ्रमणमा आउने जानकारी पनि दिएका छन्। सोही अवसरमा उपस्थित लेबनानका राजदूत नादा हमादेह मोवाद र इजरायलका राजदूत येचियल लाइटरले वार्तामा ट्रम्पले खेलेको भूमिकाको प्रशंसा गरेका थिए।
