काठमाडौँ । काठमाडौँ महानगरपालिकाले अव्यवस्थित सुकुम्बासी बस्ती व्यवस्थापन तथा घरटहरा हटाउने सरकारी अभियानमा सहकार्य गर्ने जनाएको छ। महानगरकी कार्यवाहक मेयर सुनिता डंगोलले यस कार्यमा पूर्ण समन्वय र सहयोग रहने स्पष्ट पारेकी हुन्।
सामाजिक सञ्जालमार्फत धारणा सार्वजनिक गर्दै उनले सरकारको पहललाई प्रभावकारी बनाउन महानगर तयार रहेको उल्लेख गरिन्। वैशाख ११ गते नगर कार्यपालिकाका सदस्यहरूसँग भएको छलफलपछि कानुन र न्यायको परिधिभित्र रही कार्य अघि बढाइने निर्णय गरिएको उनको भनाइ छ।
उनले सार्वजनिक, पर्ति, ऐलानी, सरकारी तथा सामुदायिक जग्गाको संरक्षणलाई प्राथमिकतामा राख्दै अनधिकृत संरचना हटाउने कार्यमा मानवअधिकारका आधारभूत मूल्य र मान्यतालाई आत्मसात् गरिने बताइन्। साथै, यस अभियानमा संलग्न सबै निकाय, पदाधिकारी तथा सर्वसाधारणलाई आवश्यक सहयोग र समन्वयका लागि आग्रहसमेत गरिएको छ।
महानगरले नदी किनार तथा सार्वजनिक स्थलहरूको संरक्षणका क्रममा घरटहरा हटाउँदा जेष्ठ नागरिक, बिरामी, गर्भवती महिला, बालबालिका तथा अपाङ्गता भएका व्यक्तिहरूको विशेष ख्याल राख्दै सम्मानजनक र सुरक्षित तरिकाले व्यवस्थापन गरिने जनाएको छ।
