सुर्खेत । सुर्खेतमा सम्पन्न बहुविषयक अन्तर्राष्ट्रिय सम्मेलन–२०२६ ले शिक्षा, प्रविधि र अनुसन्धान क्षेत्रमा सहकार्य विस्तार गर्दै शैक्षिक रूपान्तरणका लागि ठोस पहल आवश्यक रहेको निष्कर्ष निकालेको छ ।
समापन समारोहमा वक्ताहरूले सम्मेलनबाट प्राप्त उपलब्धि र निष्कर्षहरू व्यवहारमा लागू गर्न जोड दिँदै आधुनिक शिक्षा प्रणालीतर्फ रूपान्तरण अनिवार्य भएको बताए । प्रमुख अतिथि तथा मध्यपश्चिम विश्वविद्यालयका उपकुलपति प्रा. डा. ध्रुवकुमार गौतमले सम्मेलनमा उठेका विचार र सुझावहरू कार्यान्वयनमा लैजान सबै सरोकारवाला पक्ष सक्रिय हुनुपर्ने बताए ।
उनले सूचना प्रविधि र नवप्रवर्तनको तीव्र विकाससँगै शिक्षा प्रणालीमा व्यापक परिवर्तन भइरहेको उल्लेख गर्दै विश्वविद्यालयहरूलाई समयअनुकूल प्राविधिक, नीतिगत तथा प्राज्ञिक रूपमा सक्षम बनाउनुपर्नेमा जोड दिए ।
विश्वविद्यालयका रजिष्ट्रार प्रा. डा. शोभाखर कँडेलले यस्ता अन्तर्राष्ट्रिय सम्मेलनहरूले विश्वविद्यालयको अन्तर्राष्ट्रिय छवि र प्रतिष्ठा अभिवृद्धिमा महत्वपूर्ण योगदान पुर्याउने बताए । ‘अन्तर्विषयगत सहकार्यद्वारा कृत्रिम बुद्धिमत्ता र डिजिटल रूपान्तरणको युगमा दीगो भविष्य निर्माण’ भन्ने नारासहित उक्त सम्मेलन मध्यपश्चिम विश्वविद्यालय र भारतको विरला ग्लोबल विश्वविद्यालयको सहकार्यमा आयोजना गरिएको थियो ।
सम्मेलनमा २१ देशका पाँच सयभन्दा बढी सहभागीको उपस्थिति रहेको थियो भने ३५० भन्दा बढी अनुसन्धानपत्र प्रस्तुत गरिएको आयोजकले जनाएको छ । विभिन्न विषयगत सत्र, प्यानल छलफल र अन्तरक्रियामार्फत डिजिटल रूपान्तरणका अवसर र चुनौतीबारे गहन बहस गरिएको थियो ।
उद्यमशीलता र कर्णाली क्षेत्रको सम्भावना विषयक छलफलमा प्रदेशको आर्थिक विकास, जैविक विविधता, कृषि तथा वन उद्योगका अवसर र चुनौतीहरूबारे विचार आदानप्रदान गरिएको थियो । साथै, ‘ब्रेन ड्रेन’लाई ‘ब्रेन गेन’मा रूपान्तरण गर्ने उपाय तथा प्रवासी नेपाली समुदायको भूमिकाबारे पनि भर्चुअल सत्रमार्फत चर्चा गरिएको थियो ।
सम्मेलनका क्रममा नेपालका नौ विश्वविद्यालयका उपकुलपतिहरूबीच राउण्ड टेबल छलफल समेत आयोजना गरिएको थियो, जसमा पोखरा, संस्कृत, सुदूरपश्चिम, पूर्वाञ्चल, काठमाडौं, गण्डकी र राजर्षि जनक विश्वविद्यालयका प्रतिनिधिहरू सहभागी भएका थिए ।
