झापा । ‘हेल्लो सरकार’मा परेको उजुरीपछि मेचीनगर नगरपालिका, जिल्ला प्रशासन कार्यालय झापा, नेपाल प्रहरी र उपभोक्ता जागरण अभियान नेपालको संयुक्त टोलीले पूर्वीनाका काँकडभिट्टामा सोमबार बजार अनुगमन गरेको छ।
अनुगमनका क्रममा नौ वटा पसलबाट कोकाकोला, फेन्टा, स्प्राइट, किन्लेलगायतका म्याद गुज्रिएका करिब ३० कार्टुन पेय पदार्थ बरामद गरिएको मेचीनगर नगरपालिकाका खाद्य अधिकृत दिपेन्द्र कार्कीले जानकारी दिए।
टोलीले काँकडभिट्टा बजारस्थित कुमार कोल्ड सेन्टर, केआर कोल्ड सेन्टर, पौडेल ब्रदर्श स्टोर्स, कृष्ण ट्रेडर्स, भट्टराई भेराइटिज, विनोद सङ्गम किराना पसल, कञ्चन कोल्डस्टोर र आरुस स्टोर्समा अनुगमन गरेको थियो।
बरामद गरिएका सबै म्याद गुज्रिएका पेय पदार्थ जफत गरी नियमानुसार नष्ट गरिएको जनाइएको छ। यस्ता अखाद्य वस्तु बिक्री गर्ने व्यवसायीलाई सचेत गराउनुका साथै तीन दिनभित्र नगरपालिका कार्यालयमा उपस्थित हुन निर्देशन दिइएको कार्कीले बताए।
स्थानीय उपभोक्ताले काँकडभिट्टा बजारमा म्याद गुज्रिएका सामान खुलेआम बिक्री भइरहेको भन्दै ‘हेल्लो सरकार’मा उजुरी दिएका थिए। सोही उजुरीको आधारमा जिल्ला प्रशासन कार्यालयमार्फत अनुगमन कार्य अघि बढाइएको हो।
