काठमाडौँ । काठमाडौँ महानगरपालिकाको शिक्षा विभागले होस्टेलहरूको अनुगमन गर्न ५ वटा विशेष टोली परिचालन गरेको छ।
महानगरभित्र करिब ४० हजार व्यक्तिले होस्टेल सेवाको उपयोग गरिरहेको तथ्याङ्क रहेकाले सेवा गुणस्तर, मापदण्डको पालना, सुरक्षा व्यवस्था तथा व्यवस्थापनको अवस्था मूल्याङ्कन गर्न अनुगमन सुरु गरिएको हो। स्तरीय होस्टेललाई दर्ता तथा सञ्चालन प्रक्रियामा ल्याउने, सुधार गर्न सकिनेमा सुधार गर्ने र मापदण्ड पूरा नगर्ने होस्टेललाई बन्द गर्ने उद्देश्य रहेको महानगरले जनाएको छ।
अनुगमन टोलीमा शिक्षा अधिकृतको संयोजकत्वमा सम्बन्धित वडाका जनप्रतिनिधि, नेपाल होस्टेल एशोसिएसन, होस्टेल व्यवसायी संघ, कृषि तथा पशुपन्छी विभागका फुड टेक्नोलोजिष्ट तथा योजना तथा अनुगमन एकाइका प्रतिनिधिहरू सहभागी छन्।
पाँच टोलीमध्ये एक टोलीले वडा नं. १, ३, ४, ६, १६, १८ र ३० मा अनुगमन गर्नेछ। अन्य टोलीहरूले क्रमशः वडा नं. ९, ३१, १०, २९, २८ र ३२ का होस्टेलहरूको अनुगमन गर्नेछन्।
महानगरले छात्राबास (होस्टेल) सञ्चालन सम्बन्धी मापदण्ड २०८० लागू गरेको छ। मापदण्ड अनुसार दर्ता प्रक्रिया, पूर्वाधार, सुरक्षा, सरसफाइ, सीसीटीभी जडान, फायर सेफ्टी उपकरण, गोपनीयता र अनुशासनजस्ता विषय अनिवार्य गरिएको छ।
होस्टेल सञ्चालनका लागि भवन नक्सा, दर्ता कागजात, वडाको सिफारिस र अन्य आवश्यक विवरण अनिवार्य गरिएको छ। त्यस्तै शैक्षिक वातावरण, अनुशासन र सुरक्षित आवास सुनिश्चित गर्न कडा प्रावधान राखिएको महानगरले जनाएको छ।
