काठमाडौँ । प्रतिनिधिसभाका सभामुख डोलप्रसाद अर्याल र नेपालका लागि चिनियाँ राजदूत झाङ माओमिङ बीच शिष्टाचार भेटवार्ता भएको छ। भेटमा नेपाल–चीनबीचको द्विपक्षीय सम्बन्ध, संसदीय सहकार्य, विकास साझेदारी तथा क्षेत्रीय र अन्तर्राष्ट्रिय चासोका विषयमा विस्तृत छलफल भएको थियो।
सभामुख अर्यालले नेपाल–चीन सम्बन्ध लामो इतिहास, पारस्परिक विश्वास र पञ्चशील सिद्धान्तमा आधारित रहेको उल्लेख गर्दै ‘एक चीन नीति’प्रति नेपालको अडिग प्रतिबद्धता पुनः व्यक्त गरेका थिए। उनले आपसी सम्मान, समानता र सहकार्यका आधारमा सम्बन्ध अझ सुदृढ बन्दै गएको धारणा राख्दै संसदीय तहमा समेत सहकार्य विस्तार गर्नुपर्नेमा जोड दिए।
राजदूत माओमिङले नेपाललाई चीनको महत्वपूर्ण र नजिकको छिमेकीका रूपमा लिँदै विकास, पूर्वाधार निर्माण, व्यापार विस्तार तथा कनेक्टिभिटी सुदृढीकरणका क्षेत्रमा सहकार्य बढाउन चीन इच्छुक रहेको बताए। उनले नेपालमा भइरहेका विकास पहलहरूमा निरन्तर सहयोग रहने विश्वास व्यक्त गरे।
दुवै पक्षले आगामी दिनमा द्विपक्षीय सम्बन्धलाई थप उचाइमा पुर्याउने, संसदीय आदान–प्रदानलाई सक्रिय बनाउने तथा आर्थिक, सामाजिक र पूर्वाधार क्षेत्रमा सहकार्य अझ विस्तार गर्नेमा सहमति जनाएका छन्।
