हालै परेको अविरल वर्षाका कारण देशका विभिन्न भागमा बाढी र पहिरो जाँदा मुख्य राजमार्गहरू प्रभावित भएका छन्। नेपाल प्रहरीले सार्वजनिक गरेको तथ्यांक अनुसार आज बिहान ८:०० बजेसम्म कोशी, बागमती र गण्डकी प्रदेशका केही सडक खण्डहरू पूर्ण तथा आंशिक रूपमा अवरुद्ध रहेका छन्।
कोशी प्रदेशको संखुवासभामा पर्ने कोशी राजमार्ग भोटखोला गाउँपालिका–४ को बरुण क्षेत्रमा गएको पहिरोका कारण पूर्ण रूपमा अवरुद्ध भएको छ। साउन १७ गते दिउँसो करिब ४ बजे गएको पहिरोले सडक बन्द हुँदा यातायात ठप्प भएको छ।
यस्तै, भोजपुरको मध्यपहाडी लोकमार्गअन्तर्गत भोजपुर नगरपालिका–५ बोखिम क्षेत्रमा बाढीका कारण सडक अवरुद्ध भए पनि वैकल्पिक मार्ग प्रयोग गरी एकतर्फी सवारी सञ्चालन भइरहेको छ।
बागमती प्रदेशको सिन्धुपाल्चोकस्थित भोटेकोशी गाउँपालिका–२ कोदारी क्षेत्रमा गएको पहिरोले अरनिको राजमार्ग पूर्ण रूपमा अवरुद्ध बनाएको छ। साउन १६ गते साँझ करिब ६:३० बजे गएको पहिरोपछि चीनसँग जोडिने यो महत्वपूर्ण सडक खण्डमा सवारी आवागमन रोकिएको छ।
गण्डकी प्रदेशको म्याग्दीमा पनि पहिरोले सडक प्रभावित पारेको छ। अन्नपूर्ण गाउँपालिका–३ जलथले क्षेत्रमा साउन १६ गते साँझ गएको पहिरोका कारण बेनी–जोमसोम सडकखण्ड अवरुद्ध भए पनि हाल एकतर्फी रूपमा सवारी सञ्चालन भइरहेको छ।
सडक विभाग तथा सुरक्षा निकायहरूले अवरुद्ध सडक खुलाउने काम जारी राखेका छन्। यात्रामा निस्कनुअघि सम्बन्धित जिल्ला ट्राफिक प्रहरी वा प्रशासनसँग सडक अवस्थाबारे जानकारी लिन सर्वसाधारणलाई आग्रह गरिएको छ।
