सुदूरपश्चिम प्रदेश सरकारले प्रदेश सभा सचिवालयमा दर्ता गरेका दुई महत्वपूर्ण विधेयक एक वर्षदेखि अघि नबढ्दा अलपत्र अवस्थामा रहेका छन्। सभा सञ्चालन भइरहे पनि विधेयकहरू छलफलमा नआउँदा प्रक्रिया रोकिएको हो।
टीकापुर विज्ञान तथा प्रविधि विश्वविद्यालय सम्बन्धी विधेयक र बडघर/भलमनसा प्रथा संरक्षण तथा विकास सम्बन्धी विधेयक दुवै प्रदेश सभा सचिवालयमै थन्किएका छन्। यी विधेयक क्रमशः २०८१ चैत ३ र २०८२ जेठ २१ गते दर्ता भएका थिए।
विगतमा बिजनेस अभावको समस्या भोगेको प्रदेश सभामा अहिले दर्ता भएका विधेयक नै अगाडि नबढ्दा कार्यसम्पादनमाथि प्रश्न उठेको छ।
सत्तारूढ नेपाली कांग्रेसले यस विषयमा असन्तुष्टि व्यक्त गर्दै मुख्यमन्त्री कमलबहादुर शाहको अध्यक्षतामा बसेको दलको बैठकमार्फत सभामुख भीमबहादुर भण्डारीलाई विधेयक तत्काल अगाडि बढाउन आग्रह गर्ने निर्णय गरेको छ।
दलका प्रमुख सचेतक विक्रमसिंह धामीका अनुसार दुवै विधेयक सदनमा पेस भएमा छलफल प्रक्रिया अघि बढ्ने भएकाले ढिलाइ नगर्न आग्रह गरिएको हो।
यता आन्तरिक मामिला तथा कानुनमन्त्री हिरा सार्कीले भने दुवै विधेयक विचाराधीन अवस्थामा रहेको र सभाको बैठकपछि छलफल अघि बढ्ने बताउनुभएको छ।
