काठमाडौँ– नवलपरासी (बर्दघाट–सुस्तापूर्व) गैंडाकोटस्थित भृकुटी कागज कारखानामा कार्यरत ३३३ जना श्रमिकले १६ वर्षदेखि तलब नपाएको गुनासो गरेका छन्।
सोमबार सफा सुन्दर हरियाली गैँडाकोट निरन्तर शनिवार अभियानले प्रधानमन्त्री तथा मन्त्रिपरिषद् कार्यालयमा ज्ञापनपत्र बुझाउँदै १६ वर्षदेखिको बाँकी तलब तत्काल भुक्तानी गर्न माग गरेको हो।
प्रधानमन्त्रीलाई सम्बोधन गरिएको पत्रमा श्रमिकहरूको करिब ४० करोड रुपैयाँ भुक्तानी बाँकी रहेको उल्लेख गर्दै सो रकम शीघ्र उपलब्ध गराउन आग्रह गरिएको छ।
त्यस्तै, गैँडाकोट नगरपालिका क्षेत्रमा रहेको करिब ६० बिघा जग्गालाई उचित व्यवस्थापन गरी कृषि, उद्योग वा नमुना व्यवस्थित बजारका रूपमा विकास गर्न स्पष्ट योजना बनाएर कार्यान्वयन गर्न पनि माग गरिएको छ।
ज्ञापनपत्रमा निजी क्षेत्र (गोल्छा समूह)लाई हस्तान्तरण गरिएको उक्त कारखाना हाल खण्डहर अवस्थामा पुगेको उल्लेख छ। कारखाना क्षेत्रमा असुरक्षा बढेको र हावाहुरीका बेला टिन तथा संरचनाका अवशेष उडेर स्थानीय बस्तीमा जोखिम सिर्जना हुने अवस्था रहेको पनि जनाइएको छ।
श्रमिकहरूले लामो समयसम्म ज्याला नपाउँदा कतिपयको मृत्यु भइसकेको समेत पत्रमा उल्लेख छ।
उक्त उद्योग २०६७ सालदेखि पूर्ण रूपमा बन्द अवस्थामा रहेको छ।
