समस्याग्रस्त सहकारीका बचतकर्तालाई राहत: जेठ पहिलो सातादेखि रकम फिर्ता सुरु हुने
काठमाडौं । सरकारले समस्याग्रस्त सहकारीका बचतकर्ताको रकम आगामी जेठ पहिलो सातादेखि फिर्ता गर्ने प्रक्रिया सुरु गर्ने भएको छ। समस्याग्रस्त सहकारी व्यवस्थापन समितिले मंगलबार सार्वजनिक गरेको कार्ययोजनाअनुसार बचतकर्ताको रकम फिर्ता गर्ने काम औपचारिक रूपमा अघि बढ्नेछ।
गत ९ वैशाखदेखि काम सुरु गरेको समितिले सहकारी र बचतकर्ताको आवश्यक विवरण संकलन गरिसकेको जनाएको छ। समितिका अनुसार हाल करिब ७६ हजार बचतकर्ताको करिब ४६ अर्ब रुपैयाँ फिर्ता गर्नुपर्ने अवस्था रहेको छ, जसमा अधिकांश साना बचतकर्ता छन्।
समितिले पाँच लाख रुपैयाँभन्दा कम बचत भएका व्यक्तिलाई ‘साना बचतकर्ता’ र सोभन्दा बढी रकम भएकालाई ‘ठूला बचतकर्ता’का रूपमा वर्गीकरण गरेको छ। कुल बचतकर्तामध्ये करिब १८ हजारको बचत पाँच लाखभन्दा माथि रहेको जनाइएको छ।
भूमि व्यवस्था, सहकारी तथा गरिबी निवारण मन्त्री प्रतिभा रावलले बचत फिर्ताका लागि आवश्यक तयारी पूरा भइसकेको बताउँदै अब कार्यान्वयन चरणमा प्रवेश गरिने जानकारी दिइन्। उनका अनुसार प्रारम्भिक चरणमा साना बचतकर्तालाई प्राथमिकतामा राखिनेछ।
समितिले ‘बचत फिर्ता कार्य आरम्भ गर्ने र कर्जा असुलीलाई प्राथमिकता दिने’ नीति अवलम्बन गर्ने जनाएको छ। मागदाबी गरेका बचतकर्ताको रकम जेठ पहिलो साताबाट फिर्ता गर्न थालिने र छुट भएका बचतकर्तालाई पुनः मागदाबी गर्न आगामी साउन पहिलो सातामा अवसर प्रदान गरिनेछ।
त्यसैगरी, सरकारबाट चक्रीय कोषमा विनियोजित रकम अपुग भएमा आवश्यक रकम सापटीका रूपमा मात्र प्रयोग गरिने समितिको योजना छ। सदस्य सचिव रविन ढकालले कर्जा असुली प्रक्रियालाई कानुनी दायराभित्र कडाइका साथ अघि बढाइने बताएका छन्।
