काठमाडौं । राष्ट्रिय स्वतन्त्र पार्टी (रास्वपा)का सांसद राजीव खत्री ले प्रधानन्यायाधीश नियुक्ति सिफारिसलाई लिएर भइरहेको बहसमाथि टिप्पणी गरेका छन्। उनले उमेर वा वरियताभन्दा व्यक्तिको कर्म र क्षमता महत्वपूर्ण हुने बताएका छन्।
सामाजिक सञ्जालमार्फत प्रतिक्रिया दिँदै सांसद खत्रीले प्रतिस्पर्धामा धेरै व्यक्ति हुँदा जोसुकैले पनि सफलता हासिल गर्न सक्ने उल्लेख गरे। उनले ‘चार नम्बरले जित्न हुँदैन’ भन्ने तर्क गर्नु उचित नहुने बताएका छन्।
‘मैदानमा छ जनालाई दौडाएपछि जसले पनि जित्न सक्छ। चार नम्बरले जित्न हुँदैन भनेर रुनुको अर्थ छैन। मान्छे उमेरले होइन, कर्मले श्रेष्ठ हुन्छ,’ उनले लेखेका छन्।
उनले न्याय र विवेक निष्पक्ष भए मानिसले यही समाजमा स्वर्ग र नर्कको अनुभूति गर्न सक्ने धारणा पनि राखेका छन्। मानिस मरेपछि कहाँ जान्छ भन्ने विषय बहसको कुरा भए पनि न्यायपूर्ण दृष्टिकोण नै सबैभन्दा महत्वपूर्ण हुने उनको भनाइ छ।
