ग्याङ फाइटमा एक युवतीसहित ६ जना पक्राउ

Pokharaमा सार्वजनिक भएको ग्याङ फाइटको भिडियोपछि प्रहरीले एक युवतीसहित ६ जनालाई पक्राउ गरेको छ । पछिल्ला दिनमा सामाजिक सञ्जालमा भाइरल बनेको उक्त भिडियोले युवापुस्तामाझ बढ्दो हिंसात्मक प्रवृत्ति र लागुऔषध दुव्र्यसनबारे गम्भीर प्रश्न उठाएको छ ।

पक्राउ पर्नेहरूमा बाँझपाटनका २७ वर्षीय सुजन आले मगर, २३ वर्षीय राजेश परियार, गोरखा घर भई बाँझपाटन बस्दै आएका ३० वर्षीय दिलेराम गुरुङ, नुवाकोट घर भई बाग्लुङ बसपार्क क्षेत्रमा बस्दै आएका १८ वर्षीय सुजन तामाङ, २५ वर्षीय राजकुमार तामाङ तथा २० वर्षीया लिजा पुन रहेका छन् ।

District Police Office Kaskiका अनुसार वैशाख २२ गते राति बाग्लुङ बसपार्क क्षेत्रमा भएको समूहगत झडपमा उनीहरूको संलग्नता देखिएको प्रारम्भिक अनुसन्धानबाट खुलेको हो । जिल्ला प्रहरी कार्यालय र वडा प्रहरी कार्यालय बगरबाट खटिएको टोलीले उनीहरूलाई विभिन्न स्थानबाट नियन्त्रणमा लिएको जनाएको छ ।

कास्की प्रहरीका प्रवक्ता प्रहरी नायव उपरीक्षक हरिबहादुर बस्नेतका अनुसार घटनाको मुख्य कारण लागुऔषध रहेको प्रारम्भिक निष्कर्ष छ । प्रहरीको भनाइले शहरी क्षेत्रमा युवामाझ लागुऔषधको प्रभाव गहिरिँदै गएको संकेत गरेको छ ।

पछिल्ला वर्षहरूमा पोखरामा समूह बनाएर हिँड्ने, सामाजिक सञ्जालमार्फत शक्ति प्रदर्शन गर्ने तथा सामान्य विवादलाई हिंसात्मक रूप दिने प्रवृत्ति बढ्दै गएको देखिन्छ । टिकटक, फेसबुक र रिल्सजस्ता माध्यममा ‘ग्याङ संस्कृति’लाई आकर्षक ढंगले प्रस्तुत गरिँदा कतिपय युवा गलत बाटोतर्फ आकर्षित भइरहेको सरोकारवालाहरूको भनाइ छ ।

विशेषगरी बेरोजगारी, अभिभावकीय निगरानीको कमी, खराब संगत र लागुऔषधको सहज पहुँचका कारण युवाहरू हिंसात्मक गतिविधितर्फ तानिने गरेको विश्लेषण गरिएको छ । सामान्य विवादसमेत समूहगत झडपमा परिणत हुन थालेको अवस्था समाजका लागि चिन्ताको विषय बनेको छ ।

प्रहरीले घटनामा संलग्नहरूलाई पक्राउ गरे पनि केवल कारबाहीले मात्र समस्या समाधान नहुने देखिएको छ । लागुऔषध नियन्त्रण, युवामाझ सचेतना अभिवृद्धि, अभिभावकको निगरानी तथा समुदायस्तरमा परामर्श कार्यक्रम सञ्चालन गर्नुपर्ने आवश्यकता औँल्याइएको छ ।

पोखरामा भएको यो घटना केवल एउटा झडप मात्र नभई समाजमा फैलिँदै गएको विकृत संस्कृतिको संकेतका रूपमा पनि हेरिएको छ ।