काठमाडौं । राष्ट्रियसभाका सांसदहरूले सुकुम्वासी समस्याको दीर्घकालीन समाधान खोज्न, मूल्यवृद्धि नियन्त्रण गर्न तथा स्वदेशमै रोजगारी सिर्जना गर्न सरकारको ध्यानाकर्षण गराएका छन्।
राष्ट्रियसभाको आजको बैठकको शून्य समयमा सांसदहरूले जातीय विभेदका घटना न्यूनीकरण, रुग्ण उद्योग पुनः सञ्चालन तथा सुशासन कायम गर्न सरकारसँग आग्रह गरेका हुन्।
सांसद कमला पन्तले गौरवको आयोजनाका रूपमा रहेको गोरखकाली रबर उद्योग पुनः सञ्चालनको तयारीबारे सरकारसँग जवाफ माग गरिन्। सांसद जयन्ती राईले अतिक्रमण हटाउने क्रममा विस्थापित भएका सुकुम्वासीहरूको उचित व्यवस्थापन गर्न आग्रह गरिन्।
सांसद दुर्गा गुरुङले सुकुम्वासी समस्याको स्थायी समाधान आवश्यक रहेको बताइन् भने सांसद नरबहादुर विष्टले वैदेशिक रोजगारीमा निर्भरता घटाएर स्वदेशमै रोजगारी सिर्जना गर्ने योजना ल्याउन सरकारसँग माग गरे।
सांसद नारायणदत्त मिश्रले नागरिक अधिकार र लोकतन्त्रको संरक्षणमा सरकार स्पष्ट हुनुपर्ने धारणा राखे। सांसद भुवनबहादुर सुनारले जातीय विभेद नियन्त्रणका लागि प्रभावकारी कदम चाल्न सरकारसँग आग्रह गरे।
सांसद मदनकुमारी शाह (गरिमा)ले संसद्को गरिमा कायम राख्न सबै पक्ष जिम्मेवार हुनुपर्ने बताइन्। सांसद युवराज शर्माले सुशासन, मूल्यवृद्धि नियन्त्रण तथा विकास निर्माणका विषयमा सरकारको ध्यानाकर्षण गराए।
त्यस्तै, सांसद राजेन्द्रलक्ष्मी गैरेले स्वास्थ्य क्षेत्रप्रति सरकार संवेदनशील बन्नुपर्ने सुझाव दिइन् भने सांसद सोनाम गेल्जेन शेर्पाले सिंहदरबारभित्र ट्राफिक नियम उल्लङ्घन गर्ने सवारीसाधनमाथि कारबाही गर्न माग गरे।
