काठमाडौँ । रामचन्द्र पौडेल समक्ष महालेखापरीक्षकको आर्थिक वर्ष २०८१/८२ को वार्षिक प्रतिवेदन पेश गरिएको छ। राष्ट्रपति भवनमा शुक्रबार आयोजित कार्यक्रममा महालेखापरीक्षक तोयम राया ले राष्ट्रपतिसमक्ष प्रतिवेदन बुझाएका हुन्।
प्रतिवेदन ग्रहण गर्दै राष्ट्रपति पौडेलले सार्वजनिक निकायमा बढ्दो बेरुजुप्रति चिन्ता व्यक्त गरेका छन्। उनले जवाफदेहिता, पारदर्शिता र आर्थिक अनुशासनलाई प्रभावकारी रूपमा कार्यान्वयन गर्न सम्बन्धित निकाय थप जिम्मेवार हुनुपर्नेमा जोड दिए।
“बेरुजु फर्छ्योट गरी वित्तीय अनुशासन कायम गर्ने दिशामा सार्वजनिक निकायका पदाधिकारी अझ बढी उत्तरदायी बन्न आवश्यक छ,” राष्ट्रपतिले बताएका छन्।
उनले फजुल खर्च नियन्त्रण गर्दै आर्थिक अनुशासन कायम गर्न सके मुलुकमा दिगो शान्ति, सुशासन, विकास र समृद्धिको लक्ष्य हासिल गर्न सहज हुने विश्वास व्यक्त गरे।
राष्ट्रपति पौडेलले प्रतिवेदनले औँल्याएका विषयले सम्बन्धित निकाय तथा सरोकारवालालाई थप जवाफदेही बन्न प्रेरित गर्ने अपेक्षा पनि व्यक्त गरेका छन्।
साथै, बेरुजु न्यूनीकरण, आर्थिक पारदर्शिता र वित्तीय अनुशासन कायम गर्न महालेखापरीक्षकको कार्यालयको भूमिका महत्वपूर्ण रहेको उल्लेख गर्दै भविष्यमा संस्थागत क्षमता अभिवृद्धि, पेसागत दक्षता र आन्तरिक सुशासन सुदृढ गर्न कार्यालय अझ सक्रिय हुनुपर्नेमा उनले जोड दिएका छन्।
