काठमाडौँ । सवारी दुर्घटना न्यूनीकरण तथा सडक सुरक्षालाई प्रभावकारी बनाउन काठमाडौँ उपत्यका ट्राफिक प्रहरीले सञ्चालन गरेको विशेष चेकिङ अभियानअन्तर्गत १७ वटा सवारीसाधनका चालक कारबाहीमा परेका छन्।
काठमाडौँ उपत्यका ट्राफिक प्रहरी कार्यालय ले कीर्तिपुरस्थित त्रिभुवन विश्वविद्यालय प्रवेशद्वार क्षेत्रमा विशेष सवारी जाँच अभियान सञ्चालन गरेको थियो। अभियानका क्रममा ४७ वटा सवारीसाधनको प्राविधिक तथा यान्त्रिक परीक्षण गर्दा १७ वटा सवारी मापदण्डविपरीत अवस्थामा फेला परेपछि चालकलाई कारबाही गरिएको प्रहरीले जनाएको छ।
ट्राफिक प्रहरीका अनुसार जाँचका क्रममा केही सवारीसाधनमा ह्याण्डब्रेक बिग्रिएको, लाइट नबलेको, टायर अत्यधिक खिइएको तथा अन्य प्राविधिक समस्या देखिएको थियो। यस्ता कमजोर अवस्थाका सवारीसाधन सडकमा सञ्चालन हुँदा दुर्घटनाको जोखिम बढ्ने भएकाले तत्काल कारबाही गरिएको जनाइएको छ।
काठमाडौँ उपत्यका ट्राफिक प्रहरी कार्यालयका प्रवक्ता नरेशराज सुवेदी ले यान्त्रिक रूपमा कमजोर सवारीसाधन सडक सुरक्षाका लागि गम्भीर चुनौती बन्दै गएको बताए। उनले यात्रु, चालक तथा सडक प्रयोगकर्ताको सुरक्षालाई प्राथमिकतामा राखेर नियमित रूपमा विशेष चेकिङ अभियान सञ्चालन भइरहेको जानकारी दिए।
उनका अनुसार सवारीसाधनको सामान्य लापरवाहीले समेत ठूलो दुर्घटना निम्त्याउन सक्ने भएकाले यान्त्रिक रूपमा कमजोर सवारीमाथि निगरानी बढाइएको हो। उनले ट्राफिक प्रहरीको उद्देश्य जरिवाना मात्र नभई सम्भावित दुर्घटना रोक्नु र जनताको जीवन सुरक्षा गर्नु पनि रहेको स्पष्ट पारे।
ट्राफिक प्रहरीका अनुसार पछिल्लो समय भएका धेरै सडक दुर्घटनामा सवारीसाधनको प्राविधिक खराबी मुख्य कारणका रूपमा देखिएको छ। विशेषगरी लामो समयसम्म मर्मत नगरी चलाइएका सार्वजनिक तथा निजी सवारीसाधनले सडकमा जोखिम बढाइरहेका छन्।
प्रहरीले सवारीधनी, यातायात व्यवसायी तथा चालकलाई नियमित रूपमा ब्रेक, टायर, लाइट, इन्जिनलगायत उपकरणको अवस्था परीक्षण गर्न आग्रह गरेको छ। आवश्यक मर्मत तथा प्राविधिक परीक्षण नगरी सवारी सञ्चालन नगर्न पनि चेतावनी दिइएको छ।
कार्यालयले आगामी दिनमा पनि उपत्यकाका विभिन्न स्थानमा यस्ता विशेष चेकिङ अभियानलाई निरन्तरता दिइने जनाएको छ।
