भरतपुर । चितवनको इच्छाकामना गाउँपालिका–१ कुलबाङमा जङ्गली च्याउ सेवन गर्दा एकै परिवारका तीन बालबालिकाको मृत्यु भएको छ।
मृत्यु हुनेमा ९ वर्षीया नमूना चेपाङ, ११ वर्षीय सञ्जय चेपाङ र १३ वर्षीया मनिता चेपाङ रहेका छन्। उनीहरू एउटै परिवारका सदस्य भएको जनाइएको छ।
राष्ट्रिय माध्यमिक विद्यालय हात्तीबाङका प्रधानाध्यापक लोकबहादुर मगरका अनुसार नमूनाको जेठ १ गते घरमै मृत्यु भएको थियो। सञ्जयको गत शनिबार राति उपचारका क्रममा निधन भएको हो भने मनिताको आज बिहान भरतपुर अस्पतालमा उपचारका क्रममा मृत्यु भएको उनले बताए।
गत वैशाख २९ गते श्यामबहादुर चेपाङको परिवारले जङ्गलबाट ल्याइएको च्याउ पकाएर खाएपछि परिवारका सदस्य बिरामी परेका थिए। गम्भीर अवस्थामा रहेका तीनै बालबालिकालाई उपचारका लागि भरतपुर अस्पताल लगिएको थियो।
विद्यालयका अनुसार नमूना कक्षा २, सञ्जय कक्षा ३ र मनिता कक्षा ५ मा अध्ययनरत थिए। मृतक बालबालिकाका बुबाआमा भने सकुशल रहेका छन्।
दुई बालबालिकाको दाहसंस्कार सम्पन्न भइसकेको छ भने आज मृत्यु भएकी बालिकाको शव परिवारलाई बुझाउने तयारी भइरहेको विद्यालयले जनाएको छ।
