गण्डकी । जिल्ला ट्राफिक कार्यालय, कास्कीले गत वैशाख महिनामा सवारीसाधन कारबाहीबाट रु ४४ लाख आठ हजार ५०० राजस्व सङ्कलन गरेको छ । सो अवधिमा ट्राफिक नियम उल्लङ्घन गरेको आरोपमा पाँच हजार २६३ जना सवारी चालक कारबाहीमा परेका जिल्ला ट्राफिक कार्यालयले जनाएको छ ।
प्रहरी निरीक्षक सुजितकुमार देवकोटाका अनुसार ट्राफिक नियम उल्लङ्घन गरी सञ्चालन भएका सवारीसाधन र चालकलाई नियमित रूपमा कारबाही गर्दै राजस्व सङ्कलन गरिएको हो ।
वैशाख महिनामा कास्कीमा २२ वटा सवारी दुर्घटना भएको कार्यालयले जनाएको छ । ती दुर्घटनामा पाँच जनाको मृत्यु भएको छ भने २६ जना घाइते भएका छन् ।
कार्यालयका अनुसार तीमध्ये १२ वटा दुर्घटना तीव्र गतिका कारण भएको पाइएको छ । यस्तै, चालक अनुमति पत्र बिना सवारी चलाएका पाँच जना र मादक पदार्थ सेवन गरी सवारी चलाएका तीन जना चालक दुर्घटनामा संलग्न भएका थिए ।
प्रहरी निरीक्षक देवकोटाले मादक पदार्थ तथा लागूपदार्थ सेवन गरी सवारी चलाउने र तीव्र गतिमा सवारी हाँक्ने चालकलाई लक्षित गरी ट्राफिक जाँचलाई थप कडाइ गरिएको बताए ।
जिल्ला प्रहरी कार्यालय र जिल्ला ट्राफिक कार्यालय कास्कीले संयुक्त रूपमा सवारी जाँच अभियान सञ्चालन गर्दै आएको जिल्ला प्रहरी कार्यालयका प्रहरी नायब उपरीक्षक हरिबहादुर बस्नेतले जानकारी दिए । उनले ट्राफिक जाँचका क्रममा प्रहरीको व्यवहार, सुरक्षा सावधानी तथा नागरिकमैत्री सेवा सुनिश्चित गर्न नमुना जाँच कार्यक्रम पनि सञ्चालन भइरहेको बताए ।
