काठमाडौं । सार्वजनिक यातायातमा यात्रा गर्ने यात्रुहरूको सामान हराउने, चोरी हुने तथा साटिने घटनालाई नियन्त्रण गर्न अब ‘लगेज ट्याग’ प्रणाली अनिवार्य रूपमा लागू गरिने भएको छ ।
यस सम्बन्धमा काठमाडौँ उपत्यका ट्राफिक प्रहरी कार्यालय र नेपाल यातायात व्यवसायी राष्ट्रिय महासङ्घबीच शुक्रबार समझदारी पत्रमा हस्ताक्षर भएको हो ।
समझदारीअनुसार अब सार्वजनिक सवारी साधनमा यात्रुको ब्याग वा लगेज राख्दा दुई प्रति ट्याग उपलब्ध गराइनेछ । एउटा ट्याग सामानमा टाँसिनेछ भने अर्को यात्रुलाई सुरक्षित राख्न दिइनेछ । गन्तव्यमा पुगेपछि यात्रुसँग भएको ट्याग र सामानमा रहेको ट्याग मिलाएर मात्र लगेज फिर्ता दिने व्यवस्था गरिनेछ ।
सार्वजनिक सवारीमा यात्रा गर्दा झिटीगुन्टा तथा लगेज हराउने, चोरी हुने वा साटिने गुनासो बढ्दै गएपछि यात्रुको सामान सुरक्षित बनाउन र सेवा थप विश्वसनीय बनाउन यो प्रणाली लागू गर्न लागिएको जनाइएको छ ।
आधुनिक प्रविधिको प्रयोग गर्दै क्युआर कोड, बारकोड वा नम्बरिङ प्रणालीसहितको ट्याग प्रयोग गरिनेछ, जसले सामानको पहिचान सहज बनाउने विश्वास गरिएको छ ।
सम्झौताअनुसार यातायात व्यवसायीहरूले आफ्नो मातहतका सवारी साधनमा यो प्रणाली अनिवार्य लागू गर्नुपर्नेछ । साथै चालक तथा सहचालकलाई आवश्यक तालिमसमेत प्रदान गरिनेछ । ट्राफिक प्रहरीले प्रणालीको प्रभावकारी कार्यान्वयनका लागि अनुगमन र जनचेतनामूलक कार्यक्रम सञ्चालन गर्ने जनाएको छ ।
यदि ट्याग लगाइएको सामान व्यवसायीको लापरबाहीका कारण हराएमा वा क्षति पुगेमा प्रचलित कानुन वा आपसी सहमतिअनुसार यात्रुलाई उचित क्षतिपूर्ति उपलब्ध गराइने व्यवस्था पनि गरिएको छ ।
यस प्रणालीअन्तर्गत सङ्कलन गरिने यात्रुको व्यक्तिगत विवरण, जस्तै नाम र फोन नम्बर, पूर्ण रूपमा सुरक्षित राखिने तथा कुनै पनि अनधिकृत वा व्यावसायिक प्रयोजनमा प्रयोग नगरिने प्रतिबद्धता जनाइएको छ ।
यो सम्झौता २०८३ जेठ ०८ गतेदेखि लागू भई प्रारम्भिक रूपमा १० वर्षसम्म कायम रहनेछ । समझदारी पत्रमा ट्राफिक प्रहरीका तर्फबाट प्रहरी वरिष्ठ उपरीक्षक नवराज अधिकारी र महासङ्घका तर्फबाट केन्द्रीय अध्यक्ष सरोज सिटौलाले हस्ताक्षर गरेका छन् ।
