धनगढी । भारतको दिल्लीबाट चोरी गरेर नेपाल भित्र्याइएको बहुमूल्य धातु, गरगहना तथा नगदसहित दुई करोडभन्दा बढी मूल्य बराबरका सामान नेपाल प्रहरीले बरामद गरेको छ ।
तीन महिनाअघि फागुन १३ गते भारतको दिल्लीस्थित राजेन्द्रनगर निवासी संजयकुमार माखीजाको घरबाट करोडौं मूल्यका धनसम्पत्ति चोरी भएपछि आरोपीहरू फरार रहेका थिए । घटनामा संलग्न बाजुराको बुढीगंगा नगरपालिका–१० का उपेन्द्र रावतसहितको समूह नेपालतर्फ भागेको खुलेपछि नेपाल प्रहरीले अनुसन्धान अघि बढाएको थियो ।
प्रदेश प्रहरी कार्यालय धनगढीका प्रहरी निरीक्षक महेश शाहीका अनुसार भारतीय नागरिक संजयकुमार माखीजाले नेपाल प्रहरीमा उजुरी दिएपछि विभिन्न जिल्लासँग समन्वय गरेर अनुसन्धान सुरु गरिएको थियो ।
अनुसन्धानका क्रममा प्रहरीले उपेन्द्र रावतसहित बाजुराको खप्तड छान्ना गाउँपालिका–३ का लोकेश धामी र अछामको साँफेबगर नगरपालिका–४ का अर्जुन सुनारलाई पक्राउ गरेको जनाएको छ ।
प्रहरी निरीक्षक शाहीका अनुसार पक्राउ परेकाहरूले चोरीका गरगहना तथा नगद आफन्तको घरमा लुकाएर राखेका थिए । लामो अनुसन्धानपछि विभिन्न स्थानबाट उनीहरूलाई पक्राउ गरी चोरीका सामान बरामद गरिएको उनले बताए ।
प्रदेश प्रहरी कार्यालय धनगढीका प्रमुख डीआईजी ओमबहादुर रानाका अनुसार हालसम्म हिरामोती, सुनचाँदीका गरगहना, विभिन्न कम्पनीका घडी तथा नेपालसहित विभिन्न देशका मुद्रा गरी दुई करोड १० लाख रुपैयाँभन्दा बढी मूल्य बराबरका सामान बरामद गरिएको छ ।
प्रहरीका अनुसार बरामद सामग्रीमध्ये एक करोड ३४ लाख रुपैयाँ बराबरका १२ वटा घडी, ४३ लाख ३३ हजार १४५ रुपैयाँ मूल्यका सुनका गरगहना, १५ लाख ५६ हजार रुपैयाँ बराबरका हिरा तथा सुनका औंठी, दुई लाख १५ हजार ५३० रुपैयाँ बराबरका चाँदीका गरगहना र करिब तीन लाख रुपैयाँ बराबरको सुन रहेको छ । साथै उनीहरूको साथबाट १२ लाख ९० हजार नेपाली रुपैयाँ नगदसमेत बरामद गरिएको प्रहरीले जनाएको छ ।
बरामद गरिएको नगद तथा विभिन्न देशका मुद्रा सम्बन्धित व्यक्तिलाई बुझाइसकिएको प्रहरीले जानकारी दिएको छ ।
प्रदेश प्रहरी कार्यालय धनगढीका अनुसार चोरी घटनाका मुख्य आरोपी भने अझै फरार रहेका छन् । प्रहरीले बरामद गरिएको सम्पत्तिभन्दा अझै धेरै चोरीका सामान उनीहरूसँग हुन सक्ने अनुमान गरेको छ ।
प्रहरी निरीक्षक महेश शाहीले मुख्य आरोपीको खोजी कार्य जारी रहेको र छिट्टै पक्राउ पर्ने विश्वास व्यक्त गरे । यद्यपि, अनुसन्धानकै कारण मुख्य आरोपीको परिचय भने सार्वजनिक गरिएको छैन ।
