पेट्रोलियम पदार्थमा लगाइएको कर खारेज गर्न माग गर्दै चितवनमा युवाहरूले फरक शैलीमा विरोध प्रदर्शन गरेका छन् ।
नेपाल आयल निगमद्वारा पटक–पटक गरिएको इन्धन मूल्यवृद्धिको विरोधमा जेनजी अभियन्ता मिराज ढुङ्गाना को नेतृत्वमा ‘गरी खान देऊ’ चितवन शाखाले मोटरसाइकल तथा स्कुटर नचढाई हातले डोर्याउँदै विरोध र्याली निकालेको हो ।
‘पेट्रोलियम पदार्थमा ६ कर माफी अभियान’ अन्तर्गत आयोजना गरिएको र्याली चौबीसकोठी चोकबाट सुरु भई लायन्सचोकमा पुगेर समापन गरिएको थियो । कार्यक्रममा सहभागीहरूले “गरी खान देऊ” र “महँगीको मारमा सुशासन फरार” लगायतका नारा लेखिएका प्लेकार्ड र ब्यानर प्रदर्शन गरेका थिए ।
आन्दोलनकारीहरूले बढ्दो महँगीका कारण सर्वसाधारणको जनजीवन प्रभावित भएको भन्दै पेट्रोलियम पदार्थमा लगाइएका विभिन्न शीर्षकका ६ प्रकारका कर तत्काल हटाउन वा घटाउन सरकारसँग माग गरेका छन् ।
माग सम्बोधन नभए आन्दोलनलाई अझ सशक्त बनाइने चेतावनी आयोजकले दिएका छन् ।
