काठमाडौं । नेपाल बार एसोसिएसन का अध्यक्ष विजयप्रसाद मिश्र ले सर्वोच्च अदालतमा लागू गरिएको गोलाप्रथा प्रणाली हटाउने तयारीप्रति आपत्ति जनाएका छन्।
काठमाडौंमा आयोजित ‘मानसिक स्वास्थ्य र तनाव व्यवस्थापन’ विषयक अन्तरक्रिया कार्यक्रममा बोल्दै उनले गोलाप्रथा हटाएर प्रधानन्यायाधीशले आफूखुसी न्यायाधीश तोक्ने व्यवस्था ल्याइए न्यायपालिका राजनीतिक प्रभावतर्फ धकेलिने चेतावनी दिए।
उनले सर्वोच्च अदालतमा लागू गरिएको गोलाप्रथा हटाइए त्यसको विरोधमा कडा आन्दोलन गर्नुपर्ने अवस्था आउने समेत बताए।
उनले भने, “अहिले सर्वोच्च अदालतमा गोलाप्रथा हटाउने चर्चा चलिरहेको छ। यदि यो हटाइयो भने कस्तो आन्दोलन गर्ने भन्ने अर्को चिन्ता थपिनेछ।”
विजयप्रसाद मिश्र ले प्रधानन्यायाधीश नियुक्ति प्रक्रियामाथि पनि प्रश्न उठाएका छन्। उनले संवैधानिक परिषद्मार्फत प्रधानमन्त्रीले रुचाएको व्यक्तिलाई प्रधानन्यायाधीश बनाउने अभ्यास सुरु भएको टिप्पणी गरे।
उनले भने, “अब प्रधानन्यायाधीश बन्न त्याग वा तपस्या गर्नुपर्ने अवस्था रहेन। प्रधानमन्त्रीले मन पराएको व्यक्तिलाई संवैधानिक परिषद्मार्फत नियुक्त गर्ने प्रवृत्ति सुरु भएको छ। प्रधानमन्त्रीले मन परायो भने प्रधानन्यायाधीश बन्ने अवस्था विकास भएको हो कि भन्ने प्रश्न उठेको छ।”
उनले सरकारको आलोचना गर्ने व्यक्तिलाई ‘भष्मे’को संज्ञा दिन हजारौं मानिस परिचालन भइरहेको आरोपसमेत लगाए।
उनका अनुसार अहिले न्यायपालिका गम्भीर परिस्थितिबाट गुज्रिरहेको छ र यस्तो अवस्थामा कानुन व्यवसायीहरूले आफ्नो विवेक गुमाउन नहुने बताए। साथै उनले न्यायपालिका र न्यायाधीशलाई सुदृढ बनाउन कानुन व्यवसायीहरूको पनि महत्वपूर्ण जिम्मेवारी रहेको धारणा राखे।
