अनुष्का श्रेष्ठ ले अत्यधिक भारवाहक सवारीसाधनको तीव्र गतिका कारण सर्वसाधारणको ज्यान जोखिममा परेको भन्दै संसदमार्फत सरकारको ध्यानाकर्षण गराएकी छन् ।
प्रतिनिधिसभाको बुधबारको बैठकमा बोल्दै उनले ललितपुरको कार्यविनायक–नखु सडकखण्डमा भएको दुर्घटनाको उदाहरण दिँदै सडक सुरक्षाको चुनौतीबारे चर्चा गरिन् ।
सांसद श्रेष्ठले निर्धारित गति सीमाभन्दा धेरै बढी गतिमा सवारी चलाउने प्रवृत्ति बढ्दै गएको उल्लेख गर्दै यस्ता सवारीसाधनको अवस्था प्रायः जीर्ण हुने, टायर खिइएका हुने तथा ब्रेकसमेत प्रभावकारी नहुने भएकाले दुर्घटनाको जोखिम उच्च रहेको बताइन् ।
विशेषगरी बिहानको समयमा काठमाडौं उपत्यका प्रवेश गर्ने तथा भित्री सडकमा सञ्चालन हुने हेभी लोड सवारीसाधनमा यस्तो समस्या बढी देखिएको उनको भनाइ थियो ।
उनले भनिन्, “३० किलोमिटर प्रतिघण्टाको गति सीमा तोकिएको स्थानमा समेत भारी सामान बोकेका सवारी ८० किलोमिटर प्रतिघण्टाको गतिमा गुडिरहेका छन् ।”
