काठमाडौँ । प्रमुख प्रतिपक्ष दल नेकपा (एमाले) की सांसद नीता घतानीले प्रधानमन्त्री वालेन्द्र साहले लोकतन्त्रको मर्यादा उल्लङ्घन गरिरहेको आरोप लगाएकी छन् ।
बुधबार बसेको प्रतिनिधि सभा बैठकमा बोल्दै सांसद घतानीले प्रधानमन्त्री साहले जनताका प्रश्नको जवाफ नदिई लोकतान्त्रिक अभ्यासको अपमान गरिरहेको भन्दै आपत्ति जनाइन् ।
उनले प्रधानमन्त्रीलाई सदनमा उठेका प्रश्नहरूको जवाफ दिन हिम्मत भए उपस्थित हुन चुनौती दिँदै सरकारप्रति बढ्दो जवाफदेहिताको अभावप्रति कडा टिप्पणी गरिन् ।
सांसद घतानीले सरकारलाई प्रश्न गर्ने वातावरण कमजोर हुँदै गएको र आलोचना गर्न नहुने प्रवृत्ति विकास भइरहेको भन्दै चिन्ता व्यक्त गरिन् । उनका अनुसार लोकतन्त्र अन्ध समर्थन होइन र नागरिकहरू केवल ताली बजाउने भीड मात्र होइनन् भन्ने कुरा स्पष्ट हुन आवश्यक छ ।
उनले सांसदहरू जनताका प्रतिनिधि भएको उल्लेख गर्दै सरकारलाई निरन्तर जवाफदेही बनाउने दायित्व संसद्को रहेको बताइन् ।
प्रधानमन्त्री लोकप्रिय हुन सक्ने र सरकार शक्तिशाली हुन सक्ने भए पनि संसद् र जनताको प्रश्नभन्दा माथि कोही पनि हुन नसक्ने उनको भनाइ थियो ।
सांसद घतानीले प्रधानमन्त्री साहलाई सदनमा उपस्थित भई जनताका प्रश्नहरूको उत्तर दिन किन हिच्किचाइरहेको भन्दै प्रश्नसमेत गरिन् । उनले सत्ताको दम्भ दीर्घकालीन नहुने तर लोकतन्त्र र जनताको आवाज सधैं जीवित रहने उल्लेख गरिन् ।
