काठमाडौं । सरकारले गठन गरेको सम्पत्ति छानबिन समितिले निवर्तमान गृहमन्त्री तथा राष्ट्रिय स्वतन्त्र पार्टी (रास्वपा)का सांसद राष्ट्रिय स्वतन्त्र पार्टी का सुधन गुरुङसँग दोस्रो दिन पनि बयान लिएको छ ।
समितिले मंगलबार (जेठ १२) देखि गुरुङको बयान लिन सुरु गरेको थियो । बुधबार (जेठ १३) दोस्रो दिन पनि बयान प्रक्रिया जारी रहेको भए पनि पूर्ण रूपमा सम्पन्न नभएको समितिले जनाएको छ ।
गुरुङले भने निकटवर्तीहरूलाई आफ्नो बयान सकिएको जानकारी दिएका छन् । तर समितिका प्रवक्ता समेत रहेका सहन्यायाधिवक्ता अच्युतमणि न्यौपानेका अनुसार अनुसन्धान प्रक्रिया अझै जारी छ ।
“बयान सुरु भएको हो । अनुसन्धान गर्दै जाँदा फेरि पनि बयान दिनुपर्ने हुनसक्छ,” उनले भने, “समितिले प्रतिवेदन बुझाउने समय सीमित भएकाले अनुसन्धानको कामलाई तीव्र बनाइएको छ ।”
गत वैशाख २८ गते मन्त्रिपरिषद् बैठकबाट १५ दिनको समयसीमा तोकेर समिति गठन गरिएको थियो । समितिले जेठ ४ गतेदेखि औपचारिक रूपमा काम थालेको हो ।
गुरुङको सम्पत्ति विवरणमा देखिएको सुन, जग्गा लगायतका विषयमा प्रश्न उठेपछि छानबिन प्रक्रिया अघि बढाइएको हो । कतिपय जग्गा मन्त्री नियुक्त हुनु दुई दिनअघि वारेसमार्फत खरिद गरिएको विवरण सार्वजनिक भएपछि थप शंका उत्पन्न भएको थियो ।
त्यसैगरी सामाजिक कार्यका लागि स्थापना गरिएको गैरनाफामूलक संस्था ‘हामी नेपाल’ को सम्पत्ति व्यक्तिगत खातामा गएको दाबीसमेत सार्वजनिक भएपछि विवाद थपिएको थियो ।
यसपछि गुरुङले वैशाख ९ गते गृहमन्त्री पदबाट राजीनामा दिएका थिए । उनले आफ्नो राजीनामा छानबिन सहज बनाउन गरिएको बताएका थिए ।
समितिको नेतृत्व उच्च अदालतका पूर्वन्यायाधीश अच्युतप्रसाद भण्डारीले गरेका छन् । समितिमा महालेखा नियन्त्रक शोभाकान्त पौडेल र सहन्यायाधिवक्ता अच्युतमणि न्यौपाने सदस्य रहेका छन् ।
समितिको कार्यकाल यही जेठ १९ गते समाप्त हुने बताइएको छ ।
