काठमाडौं । टोखा नगरपालिका वडा नं. ९ र १० अन्तर्गत सरकारी संरचनाभित्र सञ्चालन हुँदै आएका गणेशथान क्षेत्रका पूजा सामग्री पसलहरू हटाउन डोजर चलाइएको छ । नगरपालिकाको निर्देशन अवज्ञा गर्दै तोकिएको समयभित्र संरचना नहटाइएपछि बिहीबार र डोजर परिचालन गरिएको हो ।
टोखा नगरपालिकाले यसअघि नै सरकारी संरचना तथा सार्वजनिक क्षेत्र अतिक्रमण गरी सञ्चालन गरिएका पसल हटाउन १५ दिने सूचना जारी गरेको थियो । उक्त अवधिभित्र पसल तथा टहरा नहटाइएपछि नगरपालिकाले प्रहरी प्रशासनको सहयोगमा डोजर चलाएर संरचना हटाउने प्रक्रिया अघि बढाएको जनाएको छ ।
डोजर सञ्चालनका क्रममा सम्भावित तनावलाई मध्यनजर गर्दै ठूलो संख्यामा नेपाल प्रहरी परिचालन गरिएको थियो । गणेशथान क्षेत्रमा बिहानैदेखि प्रहरीको बाक्लो उपस्थिति देखिएको थियो भने स्थानीयवासी र व्यवसायीहरूको भीडसमेत लागेको थियो ।
नगरपालिकाका अनुसार सार्वजनिक तथा सरकारी स्वामित्वको जग्गा संरक्षण गर्न अभियान सञ्चालन गरिएको हो । अतिक्रमण हटाएर क्षेत्रलाई व्यवस्थित बनाउने उद्देश्यले यस्तो कदम चालिएको नगरपालिकाको भनाइ छ ।
यता, केही व्यवसायीहरूले भने वर्षौंदेखि व्यवसाय सञ्चालन गर्दै आएको स्थान एकाएक हटाइँदा आफूहरू मारमा परेको गुनासो गरेका छन् । उनीहरूले वैकल्पिक व्यवस्थाबिना डोजर चलाउँदा दैनिक जीविकोपार्जन प्रभावित भएको बताएका छन् ।
