काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले मानव अधिकार आयोगले सार्वजनिक गरेको प्रतिवेदनलाई तत्काल कार्यान्वयनमा लैजान सरकारसँग आग्रह गरेका छन्।
राप्रपाको स्थापना दिवसको ३६औँ वर्ष प्रवेशका अवसरमा शुक्रबार काठमाडौंमा आयोजित विशेष कार्यक्रममा बोल्दै उनले उक्त प्रतिवेदन गम्भीर प्रकृतिको रहेको भन्दै सरकारले ढिलाइ नगरी कार्यान्वयन गर्नुपर्ने आवश्यकता औँल्याए।
अध्यक्ष लिङ्देनले मानव अधिकार आयोगले दोषी ठहर्याएका वा अभियुक्तका रूपमा देखिएका व्यक्तिहरूले कानुनी प्रक्रिया पूरा गरी छिटोभन्दा छिटो सफाइ लिनुपर्नेमा पनि जोड दिए। उनका अनुसार आयोगका प्रतिवेदनहरू नेपालभित्र मात्र सीमित नहुने भएकाले अन्तर्राष्ट्रिय स्तरमा समेत यसको प्रभाव रहने गर्दछ।
उनले भने, “मानव अधिकार आयोगको प्रारम्भिक प्रतिवेदन अत्यन्त महत्त्वपूर्ण छ। यसले धेरै विषय उजागर गरेको छ। सरकारले यसलाई कार्यान्वयनतर्फ अग्रसर हुनुपर्छ र दोषी भनिएका व्यक्तिहरूले पनि प्रक्रिया पूरा गरी सफाइ लिनुपर्छ।”
लिङ्देनले यस्ता प्रतिवेदनहरू संयुक्त राष्ट्रसंघ र विभिन्न अन्तर्राष्ट्रिय मानव अधिकार निकायहरूको अभिलेखमा रहने भएकाले यसको दीर्घकालीन असर पर्ने उल्लेख गरे। विगतमा यस्तै प्रतिवेदनका आधारमा केही व्यक्तिहरूलाई विदेश भ्रमणमा समेत प्रतिबन्ध लागेको उदाहरण उनले स्मरण गरे।
त्यस अवसरमा उनले आफ्नो पार्टी देशको एक मात्र वैकल्पिक राजनीतिक शक्ति भएको दाबी गर्दै निराश नभई दृढताका साथ अघि बढ्न सम्पूर्ण पार्टी पंक्तिलाई आह्वानसमेत गरे।
