काठमाडौं । राष्ट्रपति रामचन्द्र पौडेल ले कृषकको सम्मानलाई राज्यले उच्च प्राथमिकतामा राख्नुपर्ने बताएका छन्। कृषि, वन तथा वातावरण मन्त्रालयद्वारा आयोजित राष्ट्रिय उत्कृष्ट कृषक पुरस्कार कार्यक्रम–२०८२ लाई सम्बोधन गर्दै उनले किसानको प्रगति नै राष्ट्रको समृद्धिसँग प्रत्यक्ष जोडिएको उल्लेख गरे।
राष्ट्रपति पौडेलले किसानको मुस्कानमा देशको खुसी र किसानको उन्नतिमा राष्ट्रको समृद्धि गाँसिएको भन्दै कृषि क्षेत्रलाई केवल जीविकोपार्जनको माध्यम नभई राष्ट्र निर्माणको मुख्य आधारका रूपमा विकास गर्नुपर्ने धारणा राखे। उनले श्रम संस्कृतिको विकास गर्दै किसानको मेहनत, पसिना र समर्पणलाई राज्यले उचित सम्मान गर्नुपर्ने बताए।
उनले कृषि क्षेत्रको विकासका लागि राज्य, निजी क्षेत्र र सम्बन्धित निकायहरू एकजुट भएर लगानी, प्रविधि, बजारीकरण तथा युवाको सहभागिता बढाउनुपर्ने आवश्यकता औँल्याए। आधुनिक प्रविधिको प्रयोग, युवाशक्तिको ऊर्जा र दीर्घकालीन सरकारी नीतिमार्फत कृषि क्षेत्रलाई उत्पादन, रोजगारी र आर्थिक समृद्धिको मुख्य आधार बनाउन सकिने उनको भनाइ थियो।
राष्ट्रपति पौडेलले कृषक राष्ट्र निर्माणका आधारस्तम्भ भएको उल्लेख गर्दै कृषकको सम्मान गर्न पाउँदा आफूलाई गौरव महसुस भएको बताए। कृषकको सीप, मेहनत र पौरखले नै देश समृद्ध बन्ने उल्लेख गर्दै उनले राष्ट्रिय उत्कृष्ट कृषक पुरस्कार कार्यक्रमले कृषि पेसालाई सम्मानित र आकर्षक पेसाका रूपमा स्थापित गर्न सहयोग पुर्याएको धारणा व्यक्त गरे।
उनले कृषि क्षेत्रलाई व्यावसायिक, सम्मानित र आत्मनिर्भर बनाउँदै अघि बढाउन सके मात्र समृद्ध नेपालको सपना पूरा हुने बताए। साथै, राजनीतिक परिवर्तनपछि मुलुकको मुख्य आवश्यकता आर्थिक समृद्धि भएको उल्लेख गर्दै कृषि, जलस्रोत, पर्यटन, पूर्वाधार, सूचना प्रविधि र उद्योगको विस्तारलाई विकासको आधारका रूपमा अघि बढाउनुपर्नेमा जोड दिए।
राष्ट्रपति पौडेलले बदलिँदो परिवेशमा युवालाई स्वदेशमै रोजगारी सिर्जना गर्ने प्रमुख क्षेत्र कृषि नै भएको बताए। कृषि उद्योगका लागि कच्चा पदार्थको मुख्य स्रोतसमेत भएकाले यस क्षेत्रको विकासका लागि राज्यले योजनाबद्ध नीति तथा कार्यक्रम ल्याउनुपर्ने आवश्यकता उनले औँल्याए। साथै, कृषि व्यवसायलाई प्राथमिकतामा राखी युवा उद्यमशीलता केन्द्रित कार्यक्रम सञ्चालन गर्नुपर्नेमा पनि उनले जोड दिए।
