काठमाडौं । काठमाडौं उपत्यकामा ट्राफिक नियम उल्लङ्घन गर्ने एक हजार ७७३ जना सवारीचालकलाई पछिल्लो २४ घण्टामा कारबाही गरिएको छ। उक्त कारबाहीबाट राज्यकोषमा ६ लाख ४४ हजार ५०२ रुपैयाँ राजस्व संकलन भएको छ।
काठमाडौं उपत्यका ट्राफिक प्रहरी कार्यालयका अनुसार मादक पदार्थ सेवन गरेर सवारी चलाउने १०० जना, नियमविपरीत ‘राइड सेयरिङ’ गर्ने ११८ जना, ट्राफिक सङ्केत बत्ती उल्लङ्घन गर्ने १३६ जना तथा तीव्र गतिमा सवारी चलाउने २३७ जनामाथि कारबाही गरिएको हो।
त्यसैगरी, लेन अनुशासन पालना नगर्ने ८२ जना, निषेधित क्षेत्रमा हर्न बजाउने ८९ जना, सडक पेटीमा सवारी पार्किङ गर्ने १२० जना, एकतर्फी सडकमा सवारी चलाउने ९१ जना र अन्य विभिन्न ट्राफिक नियम उल्लङ्घन गर्ने ८०० जनालाई पनि कारबाही गरिएको कार्यालयले जनाएको छ।
ट्राफिक प्रहरीले सडक सुरक्षालाई प्रभावकारी बनाउन तथा सवारी अनुशासन कायम गर्न नियमित अनुगमन र कारबाहीलाई निरन्तरता दिइरहेको जनाएको छ।
