काठमाडौँ । सरकारले सार्वजनिक तथा व्यावसायिक सवारी साधनमा लाग्दै आएको वार्षिक करको दर वृद्धि गरेको छ। यातायात व्यवस्था कार्यालयमार्फत दर्ता तथा नवीकरण गर्दा तिर्नुपर्ने करमा नयाँ समायोजन भएपछि सवारी सञ्चालन खर्च बढ्ने भएको छ।
नयाँ व्यवस्थाअनुसार १३०० सीसीसम्मका कार, जिप, भ्यान र माइक्रोबसको वार्षिक कर ५ हजार ५ सयबाट बढेर ६ हजार ५ सय रुपैयाँ पुगेको छ। त्यस्तै ४००० सीसीभन्दा माथिका ठूला सवारीका लागि अब ११ हजार रुपैयाँ कर तिर्नुपर्नेछ।
मिनी ट्रक र मिनी बसतर्फ कर ९ हजार ५ सय रुपैयाँ कायम गरिएको छ भने ठूला ट्रक र बसको कर १२ हजार ५ सय रुपैयाँ तोकिएको छ।
हेभी मेसिनरी उपकरण, तेल ट्यांकर र ग्यास बुलेटको वार्षिक कर सबैभन्दा बढी १७ हजार ५ सय रुपैयाँ पुगेको छ।
त्यसैगरी विद्युतीय सवारी साधनका लागि क्षमताअनुसार ४ हजारदेखि ९ हजार ५ सय रुपैयाँसम्म कर निर्धारण गरिएको छ।
