अर्थमन्त्री डा. स्वर्णिम वाग्लेले विद्युत्मा लगाइएको मूल्य अभिवृद्धि कर (भ्याट) सरकार पछाडि नहट्ने स्पष्ट पारेका छन् । तर अन्तिम उपभोक्तालाई प्रत्यक्ष असर नपर्ने गरी सहुलियत दिने विकल्पमा छलफल भइरहेको उनले बताएका छन् ।
नेपाल आर्थिक पत्रकार संघ (नाफिज)ले सोमबार आयोजना गरेको पोस्ट बजेट छलफल कार्यक्रममा बोल्दै उनले आगामी साउनदेखि नै उपभोक्तालाई मार नपर्ने व्यवस्था ल्याइने संकेत गरे ।
उनका अनुसार विद्युत्मा भ्याट लगाउने निर्णय सरकारको ठूलो आँट हो र विगतमा छलफल भए पनि कार्यान्वयन हुन नसकेको अवस्था थियो । “विद्युत्मा भ्याट आउँछ, तर उपभोक्तालाई असर नपर्ने गरी व्यवस्था गर्छौं,” उनले भने ।
आगामी बजेटमा ५० युनिटभन्दा बढी विद्युत् खपत गर्ने उपभोक्तामाथि कर लाग्ने व्यवस्थापछि आलोचना बढेको छ । यसबारे प्रतिक्रिया दिँदै अर्थमन्त्री वाग्लेले सरकारले उपभोगमा आधारित कर प्रणालीतर्फ अघि बढेको बताए ।
उनले सबै सेवा निःशुल्क वा वितरणमुखी भए अर्थतन्त्र प्रभावित हुने भन्दै कर प्रणालीलाई उपभोगमा आधारित बनाउनु आवश्यक रहेको तर्क गरे । साथै, बजेटले आगामी पाँच वर्षका लागि नीतिगत दिशा तय गरेको पनि उनले स्पष्ट पारे ।
