आइतबार प्रतिनिधिसभा बैठकमा भएको तनावपूर्ण घटनाबारे बोल्दै सांसद रिंगला यादव ले आफूहरू सभामुखमाथि हातपात गर्न नभई माइक खोस्न गएको दाबी गरेकी छन्।
शिलापत्रासँगको कुराकानीमा उनले नियमावलीमाथि थप छलफल गरी समितिमा पठाउनुपर्ने विपक्षी दलहरूको माग सभामुखले बेवास्ता गरेको आरोप लगाइन्। सभामुख सत्तापक्षप्रति पक्षपाती बनेको र विपक्षीको आवाज नसुनेको उनको भनाइ छ।
यादवले भनिन्, “हामीले सभामुखमाथि हातपात गर्ने वा संसदको अपमान गर्ने कुनै उद्देश्य राखेका थिएनौँ। हाम्रो उद्देश्य माइक खोस्ने मात्र थियो, ताकि नियमावली जबर्जस्ती पारित हुन नसकोस्। माइक खोस्न खोज्दा हातपात गर्न खोजेको जस्तो प्रचार गरिएको छ।”
उनले भाइरल भिडियोबारे पनि प्रतिक्रिया दिँदै आफूले कसैलाई मुक्का हान्न खोजेको नभई नाराबाजीका क्रममा हात उठाएको दाबी गरिन्। “हात उठाएर नारा लगाउँदा एआईको प्रयोग गरेर मुक्का प्रहार गर्न खोजेको जस्तो देखाइएको छ,” उनले भनिन्।
यादवले संसदमा तनावपूर्ण अवस्था सिर्जना हुनुमा सभामुखको भूमिका रहेको आरोप लगाउँदै विपक्षीका माग सम्बोधन गरिएको भए विवाद नै उत्पन्न नहुने बताइन्। साथै, सत्तापक्षका केही सांसदहरूले पनि आक्रामक व्यवहार गरेको र आफूहरूलाई अपमानित गर्ने प्रयास भएको उनको दाबी छ।
उनले विपक्षी दलका माग पूरा नभएसम्म आफ्नो विरोध जारी रहने समेत बताएकी छन्।
