काठमाडौँ — श्रम संस्कृतिपार्टीका अध्यक्ष हरकाज राय नेतृत्वको पार्टीले प्रधानमन्त्रीको सीमा सम्बन्धी अभिव्यक्तिलाई ‘राष्ट्रिय हितविपरीत’ भन्दै तत्काल संसदको रोष्ट्रमबाट माफी माग्न माग गरेको छ।
आर्यन राय ले प्रतिनिधिसभा बैठकमा बोल्दै प्रधानमन्त्रीको भनिएको अभिव्यक्तिप्रति कडा आपत्ति जनाएका हुन्। उनले नेपालले कुनै पनि देशको भूमि अतिक्रमण गरेको छैन भन्ने स्पष्ट पार्दै प्रधानमन्त्रीको भनाइ गलत, कमजोर र तथ्यहीन भएको दाबी गरे।
उनले भने, “यदि भोलि भारतले पनि हाम्रो भूमि माग्यो भने हामी कुन भूमि फिर्ता दिन्छौँ?” भन्दै प्रधानमन्त्रीको अभिव्यक्तिले आफू लज्जित र दुःखी भएको बताएका छन्।
रायले नेपालको सार्वभौमसत्ता, राष्ट्रिय एकता र भौगोलिक अखण्डता कुनै एक व्यक्ति वा दलको विषय नभएको उल्लेख गर्दै यस्ता संवेदनशील विषयमा जिम्मेवार र स्पष्ट अभिव्यक्ति आवश्यक हुने बताए।
उनले थप भने, “यदि प्रधानमन्त्रीले यस्तो कमजोर र गलत जवाफ दिने हुन् भन्ने थाहा पाएको भए म त्यो प्रश्न नै गर्दिनथेँ। यस्तो अभिव्यक्तिले भविष्यमा गम्भीर नजिर बस्न सक्छ।”
सांसद रायले प्रधानमन्त्रीले संसदको रोष्ट्रममा आएर आफ्नो भनाइ सच्याउँदै माफी माग्नुपर्ने माग समेत गरेका छन्।
