काठमाडौं । दिउँसो १ बजेका लागि बोलाइएको प्रतिनिधिसभा बैठक अपराह्नसम्म पनि सुरु हुन सकेको छैन। प्रधानमन्त्री बालेन्द्र शाहले नेपालको भूमिसम्बन्धी दिएको अभिव्यक्तिलाई लिएर विपक्षी दलहरूले निरन्तर संसद् अवरुद्ध गर्दै आएका छन्।
विपक्षी दलहरूले प्रधानमन्त्रीले सार्वजनिक रूपमा माफी नमागेसम्म र विवादित अभिव्यक्ति संसद्को अभिलेखबाट नहटाएसम्म बैठक सञ्चालन हुन नदिने अडान दोहोर्याएका छन्।
यसअघि सोमबार बसेका प्रतिनिधिसभाका दुवै बैठक कार्यसूचीमा प्रवेश नै नगरी स्थगित भएका थिए।
उता मन्त्रिपरिषद् बैठकपछि सञ्चारकर्मीसँग कुरा गर्दै सरकारका प्रवक्ता सस्मित पोखरेलले प्रधानमन्त्रीको अभिव्यक्ति तथ्यमा आधारित रहेको दाबी गरेका छन्। आवश्यक परे प्रधानमन्त्री स्वयं संसद्मा उपस्थित भएर थप स्पष्टीकरण दिन तयार रहेको उनले बताएका छन्।
यता मंगलबार बसेको राष्ट्रिय सभा बैठक पनि लगातार दोस्रो दिन अवरुद्ध भएको छ। प्रधानमन्त्रीको अभिव्यक्तिप्रति असन्तुष्टि जनाउँदै सांसदहरूले विरोध गरेपछि राष्ट्रिय सभा अध्यक्ष नारायण दाहालले बैठक बुधबारसम्मका लागि स्थगित गरेका छन्।
प्रधानमन्त्रीको अभिव्यक्तिलाई लिएर संसद्का दुवै सदनमा जारी गतिरोधका कारण संसदीय कामकारबाही प्रभावित बनेको छ।
