विराटनगर – वैदेशिक रोजगारीका लागि रोमानिया पठाइदिने भन्दै सर्वसाधारणबाट लाखौँ रुपैयाँ असुलेको आरोपमा मोरङबाट एक म्यानपावर सञ्चालक पक्राउ परेका छन्।
पक्राउ पर्नेमा मोरङको रतुवामाई नगरपालिका–८ निवासी ३७ वर्षीय उद्धव पाठक रहेका छन्। प्रहरीले पाठकसँगै म्यानपावरमा लेखापालका रूपमा कार्यरत रतुवामाई–९ का अभि भण्डारीलाई पनि नियन्त्रणमा लिएको छ।
प्रहरीका अनुसार पाठकले रतुवामाई–८ दाम्राभिट्टामा ‘केएसए’ नामक म्यानपावर सञ्चालन गर्दै आएका थिए। उनले आकर्षक तलब र रोजगारीको प्रलोभन देखाउँदै रोमानिया पठाइदिने आश्वासनमा विभिन्न व्यक्तिबाट ठूलो रकम उठाएको आरोप छ।
इलाका प्रहरी कार्यालय सिजुवाबाट इन्स्पेक्टर कैलाश लिम्बूको नेतृत्वमा खटिएको टोलीले सोमबार साँझ दुवै जनालाई पक्राउ गरेको मोरङ प्रहरी प्रमुख एसपी कवित कटवालले जानकारी दिए।
पक्राउ परेका दुवै जनाविरुद्ध ठगी मुद्दामा अनुसन्धान भइरहेको छ। अदालतबाट ६ दिनको म्याद थप गरी उनीहरूलाई इलाका प्रहरी कार्यालय सिजुवाको हिरासतमा राखिएको छ।
प्रहरीका अनुसार पाठक लामो समयदेखि फरार रहेका थिए। उनीविरुद्ध मोरङका विभिन्न प्रहरी कार्यालय तथा काठमाडौंमा समेत किटानी जाहेरी परेको खुलेको छ। प्रारम्भिक अनुसन्धानबाट उनले विदेशमा बसेर समेत आफ्नो नेटवर्क सञ्चालन गरेको देखिएको छ। केही समयअघि मात्र रोमानियाबाट नेपाल फर्किएका पाठक पछिल्लो एक सातादेखि आफ्नै घरमा बसिरहेको अवस्थामा पक्राउ परेका हुन्।
अनुसन्धानका क्रममा पाठकले वैदेशिक रोजगारीको नाममा एक व्यक्तिबाट एक लाखदेखि चार लाख रुपैयाँसम्म असुलेको खुलेको छ। हालसम्म सयभन्दा बढी व्यक्ति ठगीमा परेको हुन सक्ने प्रहरीको अनुमान छ।
प्रहरीका अनुसार ठगीको रकम लेखापाल अभि भण्डारीको बैंक खातामा जम्मा गराइन्थ्यो। रकम संकलन गरेपछि न त भिसा प्रक्रिया अघि बढाइन्थ्यो, न विदेश पठाउने कुनै ठोस पहल नै गरिन्थ्यो।
पीडितहरूले दिएको जाहेरी अनुसार ३–४ वर्षअघि रकम बुझाए पनि अहिलेसम्म रोजगारीका लागि विदेश पठाउने काम नभएको पाइएको छ। ठगीको वास्तविक रकम र पीडितको संख्या यकिन गर्न थप अनुसन्धान भइरहेको प्रहरीले जनाएको छ।
