काठमाडौं । काठमाडौँ उपत्यका ट्राफिक प्रहरी कार्यालयले सवारी नियम उल्लङ्घन गर्ने १ हजार २९९ जना चालकलाई एकै दिन कारबाही गरेको जनाएको छ। उक्त कारबाहीबाट राज्यकोषमा २३ लाख ७१ हजार ४२ रुपैयाँ राजस्व सङ्कलन भएको कार्यालयले जनाएको छ।
कार्यालयका अनुसार मादक पदार्थ सेवन गरी सवारी चलाउने ११९ जना, नियमविपरीत राइड सेयरिङ गर्ने १६० जना, ट्राफिक सङ्केत बत्ती उल्लङ्घन गर्ने १३४ जना तथा तीव्र गतिमा सवारी चलाउने ११८ जनामाथि कारबाही गरिएको हो।
त्यसैगरी लेन अनुशासन उल्लङ्घन गर्ने ११४ जना, निषेधित क्षेत्रमा हर्न बजाउने ९४ जना, सडक पेटीमा सवारी पार्किङ गर्ने १२० जना तथा एकतर्फी सडकमा सवारी चलाउने १४४ जनालाई पनि कारबाही गरिएको प्रहरीले जनाएको छ।
ट्राफिक प्रहरीले सवारी नियमको पालना गर्न सबै चालकलाई आग्रह गर्दै नियम उल्लङ्घन गर्नेहरूमाथि निगरानी र कारबाहीलाई थप प्रभावकारी बनाइने जनाएको छ।
