काठमाडौं । राष्ट्रिय प्रजातन्त्र पार्टी (राप्रपा)का महामन्त्री Dhawal Shumsher Rana सहित १८३ जना नेताकार्यकर्ताले पार्टी परित्याग गरेका छन्।
उपत्यकाका विभिन्न पदाधिकारी, नेता, केन्द्रीय सदस्य तथा भ्रातृ एवं जनवर्गीय संगठनका पदाधिकारी, सदस्य र कार्यकर्ताले सामूहिक रूपमा पार्टीबाट राजीनामा दिएका हुन्।
राणा पक्षले पार्टीको मूल नेतृत्व कमजोर, आत्मकेन्द्रित र सिद्धान्तविपरीत ढंगले अघि बढेकाले पार्टीको भविष्य संकटमा परेको आरोप लगाएको छ। उनीहरूले पार्टीको वैचारिक आधार र विश्वासबाट नेतृत्व विचलित भएको, एकता महाधिवेशनको म्यान्डेटलाई बेवास्ता गरेको तथा केन्द्रीय कार्यसमितिलाई जानकारीसमेत नदिई तत्कालीन Pushpa Kamal Dahal नेतृत्वको सरकारको ‘संघीय लोकतान्त्रिक गणतन्त्रलाई सुदृढ बनाउने’ न्यूनतम साझा कार्यक्रममा सहभागी बनेको दाबी गरेका छन्।
राजीनामा पत्रमा उनीहरूले संवैधानिक राजसंस्था पुनःस्थापनाको उद्देश्य बोकेको पार्टी नेतृत्वले गणतन्त्र सुदृढीकरणको पक्षमा किन भूमिका खेल्यो भन्ने प्रश्न उठाएका छन्। साथै, पार्टीको मूल नीति र महाधिवेशनको निर्णयविपरीत कदम चाल्नुको कारणबारे नेतृत्व मौन रहेको आरोप पनि लगाइएको छ।
राणा पक्षका अनुसार केन्द्रीय कार्यसमिति, केन्द्रीय कार्यसम्पादन समितिलगायत वैधानिक निकायमा पटक–पटक प्रश्न उठाइए पनि सम्बन्धित पक्षबाट कुनै स्पष्ट जवाफ प्राप्त भएको छैन।
उनीहरूले विधानअनुसार जेठभित्र महाधिवेशन सम्पन्न गर्नुपर्ने निर्णयसमेत कार्यान्वयन नभएको र राजसंस्था पुनःस्थापनासम्बन्धी आन्दोलनलाई कमजोर बनाउने काममा पार्टी नेतृत्व स्वयं सक्रिय रहेको आरोप लगाएका छन्।
