काठमाडौं । राष्ट्रिय स्वतन्त्र पार्टी (रास्वपा)ले जिल्ला अधिवेशनको तयारीलाई तीव्रता दिँदै देशभरका ७७ वटै जिल्लामा निर्वाचन समिति गठन गरेको छ।
केन्द्रीय निर्वाचन आयोगका प्रमुख भुवन केसीका अनुसार शनिबार र आइतबार हुने जिल्ला अधिवेशनका लागि प्रत्येक जिल्लामा तीन सदस्यीय निर्वाचन समिति गठन गरिएको हो।
उनले सबै जिल्लामा निर्वाचन समिति परिचालन भइसकेको र महाधिवेशनको कार्यतालिकाअनुसार अधिवेशनसम्बन्धी कामहरू अगाडि बढिरहेको जानकारी दिए। उनका अनुसार समितिले जिल्लास्तरीय अधिवेशन सम्पन्न गराएर प्रतिवेदन केन्द्रमा बुझाउनेछ।
केही स्थानीय तहमा परेको उजुरीका कारण बागमती र मधेश प्रदेशका केही पालिकामा अधिवेशन स्थगित गरिएको छ भने कतिपय स्थानमा पुनः निर्वाचन गराउन निर्देशन दिइएको केसीले बताए।
रास्वपाको विद्यमान विधानअनुसार जिल्ला समितिमा एक सभापति, एक उपसभापति, एक सचिव, एक सहसचिव तथा पाँच जना समावेशी सदस्य रहने व्यवस्था छ। साथै, प्रत्येक निर्वाचन क्षेत्रबाट एक–एक जना प्रतिनिधि जिल्ला अधिवेशनबाट निर्वाचित हुनेछन्।
निर्वाचित समितिबाट सभापतिले एक जना कोषाध्यक्ष मनोनयन गर्ने व्यवस्था रहेको छ। जिल्ला समिति बिजोर सङ्ख्याको हुने गरी सभापतिले आवश्यकता अनुसार थप दुई वा तीन जना सदस्य मनोनयन गर्न सक्ने प्रावधान पनि विधानमा रहेको छ।
यसअघि पार्टीले जेठ २६ गतेदेखि हुने प्रदेश अधिवेशनको तयारीस्वरूप कर्णाली र सुदूरपश्चिम बाहेकका प्रदेशमा अधिवेशन समन्वय, सहजीकरण तथा प्रदेश निर्वाचन आयोग गठनको जिम्मेवारी केन्द्रीय निर्वाचन आयोगका सदस्यहरूलाई प्रदान गरिसकेको थियो।
