प्रस्तावित सुक्खा बन्दरगाह क्षेत्रको अवलोकन गर्दै सभामुख अर्याल र अध्यक्ष दाहाल

काठमाडौं। सभामुख डोलप्रसाद अर्याल तथा राष्ट्रियसभाका अध्यक्ष नारायणप्रसाद दाहाल ले कञ्चनपुरको दोधारा–चाँदनी क्षेत्रमा निर्माणको तयारीमा रहेको प्रस्तावित सुक्खा बन्दरगाह स्थलको अवलोकन गरेका छन्।

सुदूरपश्चिम प्रदेशमा आयोजित उच्चस्तरीय अन्तर–व्यवस्थापिका सम्मेलनमा सहभागी हुन पुगेका उनीहरूले आज उक्त क्षेत्रको निरीक्षण गर्दै व्यापार तथा आर्थिक विकासका लागि महत्वपूर्ण मानिएको पूर्वाधार परियोजनाबारे जानकारी लिएका हुन्।

अवलोकन भ्रमणमा उपसभामुख रूबी कुमारी र राष्ट्रियसभाकी उपाध्यक्ष लीलाकुमारी भण्डारी समेत सहभागी थिइन्। भ्रमणका क्रममा टोलीले धार्मिक, पर्यटकीय तथा आर्थिक महत्व बोकेको भक्केनी धाम, ब्रह्मदेव तथा टनकपुर क्षेत्रको समेत अवलोकन गरेको सभामुखको सचिवालयले जनाएको छ।

त्यसैगरी, सभामुख अर्याल र अध्यक्ष दाहालले महेन्द्रनगर विमानस्थल तथा शुक्लाफाँटा राष्ट्रिय निकुञ्ज क्षेत्रको पनि अवलोकन गरेका छन्। सो क्रममा महेन्द्रनगर विमानस्थलको स्तरोन्नति, सेवा विस्तार तथा क्षेत्रीय हवाई पहुँच वृद्धि गर्ने सम्भावनाबारे सरोकारवालासँग छलफल भएको जनाइएको छ।