धादिङ/हेटौंडा । राष्ट्रिय स्वतन्त्र पार्टी (रास्वपा)का सभापति रवि लामिछानेले पार्टीको लक्ष्य केवल वैकल्पिक शक्ति बन्ने नभई मुलुकको नेतृत्व गर्न सक्ने सक्षम राजनीतिक शक्तिका रूपमा स्थापित हुनु रहेको बताएका छन्।
शनिबार सामाजिक सञ्जालमार्फत पार्टीका नेता तथा कार्यकर्तालाई सम्बोधन गर्दै उनले रास्वपालाई अझ फराकिलो, समावेशी र सुदृढ संगठनका रूपमा विकास गर्न आवश्यक रहेको उल्लेख गरेका हुन्। पार्टी विस्तारसँगै व्यक्तिगत स्वार्थ र संकीर्ण सोच त्याग्नुपर्नेमा जोड दिँदै उनले पार्टी ठूलो बन्दा सबैको भूमिका अझ महत्वपूर्ण र अर्थपूर्ण बन्ने बताए।
सभापति लामिछानेले रास्वपाको पहिलो महाधिवेशनलाई सभ्य, भव्य, सुसंस्कृत र सन्देशमूलक बनाउन सबैलाई आग्रह गरेका छन्। उनका अनुसार वडा र पालिका तहका अधिवेशनहरू सफलतापूर्वक सम्पन्न भइसकेका छन् भने आज र भोलि जिल्ला अधिवेशनहरू सञ्चालन भइरहेका छन्।
उनले अधिवेशन र महाधिवेशनलाई नेतृत्व चयनको प्रक्रिया मात्र नभई पार्टीको दीर्घकालीन जीवन, विधि, पद्धति, लोकतान्त्रिक अभ्यास तथा स्वस्थ राजनीतिक संस्कार निर्माण गर्ने ऐतिहासिक अवसरका रूपमा व्याख्या गरेका छन्। यस प्रक्रियाले पार्टीको भावी यात्रालाई स्पष्ट दिशा प्रदान गर्ने विश्वास पनि उनले व्यक्त गरेका छन्।
लामिछानेले रास्वपाको पहिलो ऐतिहासिक महाधिवेशनले संगठनलाई थप मजबुत बनाउँदै देशमा सकारात्मक राजनीतिक सन्देश प्रवाह गर्ने अपेक्षा व्यक्त गरेका छन्।
