काठमाडौं । ट्राफिक नियम उल्लंघन गरेको भन्दै श्रम संस्कृति पार्टीका अध्यक्ष तथा प्रतिनिधिसभा सदस्य हरक साम्पाङ माथि कानुनी कारबाही प्रक्रिया अघि बढाइने भएको छ।
कोशी प्रदेश प्रहरी प्रमुख विनोद घिमिरे ले साम्पाङले ट्राफिक नियम स्पष्ट रूपमा उल्लंघन गरेको देखिएकाले सम्बन्धित प्रहरी कार्यालयमार्फत आवश्यक कारबाही गरिने जानकारी दिनुभयो।
सामाजिक सञ्जालमा सार्वजनिक भएको भिडियोमा साम्पाङले मोटरसाइकल चलाउँदा एक हातले मात्र ह्यान्डल समातेको, मोबाइल प्रयोग गर्दै सेल्फी भिडियो बनाएको तथा हेल्मेटको स्ट्र्यापसमेत नलगाएको देखिएको छ। प्रहरीका अनुसार यी कार्यहरू ट्राफिक नियमविपरीत हुन्।
उदयपुरको कटारीबाट फर्किने क्रममा साम्पाङ मोटरसाइकल दुर्घटनामा परेका थिए। दुर्घटनामा उनको हात लगायत शरीरका केही भागमा सामान्य चोट लागेको बताइएको छ। साम्पाङले सडकमा रहेको ढुंगाका कारण सन्तुलन गुम्दा दुर्घटना भएको प्रतिक्रिया दिएका छन्।
कानुन निर्माण गर्ने जिम्मेवारीमा रहेका जनप्रतिनिधिले नै ट्राफिक नियमको बेवास्ता गरेको भन्दै सामाजिक सञ्जालमा आलोचना भइरहेको छ। सर्वसाधारणले पनि तत्काल कानुनी कारबाहीको माग गर्दै प्रहरीलाई ध्यानाकर्षण गराइरहेका छन्।
