परराष्ट्रमन्त्री शिशिर खनालले करिब दुई वर्षदेखि रोकिएका नेपाल–भारतबीचका औपचारिक उच्चस्तरीय भ्रमणहरू पुनः सुरु भएको बताएका छन्।
भारत भ्रमण सम्पन्न गरी स्वदेश फर्किएपछि त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै मन्त्री खनालले आफ्नो भ्रमणले दुवै देशबीच उच्चस्तरीय कूटनीतिक भ्रमणको नयाँ चरणको सुरुआत गरेको बताए।
उनले भने, “नेपाल र भारतबीच औपचारिक उच्चस्तरीय भ्रमण भएको करिब दुई वर्ष भइसकेको थियो। मेरो यो भ्रमणले उच्चस्तरीय सरकारी भ्रमणहरूको शृङ्खला पुनः प्रारम्भ गरेको छ। आगामी केही महिनाभित्र दुवै देशबाट उच्चस्तरीय भ्रमणहरू हुने अपेक्षा गरेका छौँ।”
मन्त्री खनालले नेपाल–भारत सम्बन्धलाई थप सुदृढ बनाउन नियमित संवाद, कूटनीतिक सम्पर्क तथा उच्चस्तरीय भ्रमणहरूको आदानप्रदान महत्त्वपूर्ण रहने विश्वास व्यक्त गरे।
