काठमाडौँ। गृहमन्त्री सुधन गुरुङले बालाजु नयाँ बसपार्कस्थित सुकुम्बासी परिवारहरू राखिएको दुईवटा होल्डिङ सेन्टरको आकस्मिक अवलोकन गर्नुभएको छ। अवलोकनका क्रममा उहाँले त्यहाँ बसोबास गरिरहेका परिवारसँग विगतमा भएका कमजोरीप्रति माफी माग्दै सरकार उनीहरूको उचित व्यवस्थापनका लागि प्रतिबद्ध रहेको बताउनुभयो।
आफू गृह मन्त्रालयको जिम्मेवारीमा नरहेका बेला सुकुम्बासी बस्ती हटाइएको भए पनि सरकार पीडितहरूको व्यवस्थापनप्रति गम्भीर रहेको उहाँले स्पष्ट पार्नुभयो। व्यवस्थापनका क्रममा कुनै कमीकमजोरी भएको भए क्षमा गरिदिन आग्रह गर्दै गृहमन्त्री गुरुङले भन्नुभयो, “सरकारले कुनै पनि हालतमा तपाईंहरूको उचित व्यवस्थापन गर्नेछ। अहिले पनि हाम्रो ध्यान यही विषयमा केन्द्रित छ।”
भेटका क्रममा सुकुम्बासी परिवारहरूले आफ्ना समस्या र गुनासाहरू गृहमन्त्रीसमक्ष राखेका थिए। हाल बसोबास र खानपानमा सहजता भए पनि बालबालिकाको शिक्षादीक्षा प्रभावित भएको तथा स्वास्थ्य उपचारका लागि चिकित्सकहरू नआएको उनीहरूको गुनासो थियो।
पीडितहरूको गुनासो सुनेलगत्तै गृहमन्त्री गुरुङले उक्त क्षेत्रमा प्रहरी टोली खटाउन निर्देशन दिनुभएको छ। होल्डिङ सेन्टरको अवस्थाबारे नियमित जानकारी राख्न, स्वास्थ्य समस्या वा आकस्मिक अवस्था उत्पन्न भए तुरुन्त उद्धार गरी अस्पताल पुर्याउने व्यवस्था मिलाउन उहाँले सम्बन्धित निकायलाई निर्देशन दिनुभयो।
गृहमन्त्री स्वयं भेट्न आएपछि सुकुम्बासी परिवारमा नयाँ आशा जागेको छ। आफ्ना लागि स्थायी बसोबास र जग्गा व्यवस्थापनको पहल हुने अपेक्षासहित उनीहरू आशावादी देखिएका छन्।
